Мемлекеттік сатып алу порталына мониторинг жүргізген департамент мамандары жарты жыл ішінде 580 млн теңгеден астам қаржыны бюджет қоржынына қайтарып берген. Превенция және парасаттылық басқармасының басшысы Рүстем Болаттың айтуынша, жыл басынан бері 174 лот бойынша 100-ден астам тапсырыс берушіге ұсынымдар жоғары бағамен жіберіліп отырған.
– Бірыңғай сатып алу терезесі порталын мониторингілеу, ең алдымен, сыбайлас жемқорлықтың алдын алу және дер кезінде ескерту тетігі болып саналады. Сондай-ақ бюджетті игерудің бастапқы кезеңінде сыбайлас жемқорлық тәуекелдерін жоюға мүмкіндік береді. Бұл салық төлеушілердің ақшасын үнемдеп қана қоймай, лауазымды тұлғалардың осы қаражатты ұтымды жоспарлап, игерудегі жауапкершілігін арттыруға мүмкіндік береді. Сондықтан осы бағытта жұмысты сапалы жалғастыру қажет, – деді облыстық Сыбайлас жемқорлыққа қарсы департаменттің басшысы Қуаныш Бекбасов.
Жиын барысында Мемлекет басшысының 2020 жылғы 1 қыркүйектегі Жолдауын іске асыру жөніндегі Жалпыұлттық іс-шаралар жоспарын орындау барысында облыс бойынша 500-ден астам мемлекеттік мекемеде сыбайлас жемқорлық тәуекелдерін анықтау мақсатындағы ішкі талдау шаралары жүргізілгені айтылды. Олардың ішінде қала және аудан әкімдіктері, облыстық басқармалар, сондай-ақ ауылдар мен ауылдық округ әкімдерінің аппараттары бар. Нәтижесінде, 613 сыбайлас жемқорлық тәуекелі анықталып, мемлекеттік органдарға анықталған келеңсіздікті жою туралы 1 мыңға жуық ұсынымхат жіберілген.
– Бұл шаралар салалық заңдардың кемшін тұстарын анықтауға, сондай-ақ мемлекеттік органдар қызметіндегі ішкі олқылықтарды дер кезінде көре білуге мүмкіндік береді. Сондай-ақ алдағы уақытта мемлекеттік органдардағы сыбайлас жемқорлық тәуекелдерінің туындау мүмкіндігін айтарлықтай төмендетуі тиіс, – деді департамент басшысы.
Қуаныш Бекбасов алдағы уақытта сыбайлас жемқорлықтың алдын алу, ескерту шараларына басымдық берілетінін атап өтті. Департамент басшысының сөзінше, жыл басынан бері түрлі деңгейдегі мемлекеттік органдарға қылмыстың және басқа да құқық бұзушылықтардың себеп-салдарларын жою жөнінде 27 ұсынысхат жіберілген. Олардың бесеуі жекелеген басшыларға қатысты екен.
Алғашқы жартыжылдықта аталған департаменттің мамандары 42 қылмыстың бетін ашқан. Оның 39-ы сыбайлас жемқорлыққа қатысты қылмыс саналады. Бұл істерді тергеу барысында қылмыскерлердің мемлекетке 707 млн теңге зиян келтіргені анықталып отыр.
– Бүгінге дейін 706 млн теңге қайта өндіріліп алынды. 22 адам қылмыстық жауапкершілікке тартылды. Оның ішінде 2 облыстық, 3 қалалық және 2 аудандық деңгейдегі 7 мемлекеттік мекеменің басшысы бар, – деді Қ.Бекбасов.
Қостанай облысы
