Экспедицияға аттанған павлодарлықтар Молдова Республикасындағы «Еске алу вахтасына» аттанды. «Майдан жолы» жасағы Ұлы Отан соғысы жылдарында хабар-ошарсыз кеткендерді іздеуге көмектесуде. Хабар-ошарсыз кеткендердің қатарында қазақстандықтар да бар.
Павлодар жасағының командирі Александр Шитовтың айтуынша, «Вахтаның» екінші күнінде іздеу жұмыстары Молдова Республикасының Спея ауылының маңында жүргізілген.
«Молдавиялық және қазақстандық іздеушілер із-түзсіз жоғалған кеңестік сарбаздар мен офицерлердің сүйектерін іздестіруде. Экспедицияға «Майдан жолы», «Август» іздеу жасағы мен орыс тарихи-патриоттық клубы қатысып жатыр. «Вахтаның» екінші күні 80,4 биіктігінде (Даңқ қорғаны) бесінші және сегізінші армиялардың шайқас орындарында бір жауынгердің сүйегі табылды», деді Александр Шитов.
Павлодарлықтар ел тарихындағы «Еске алу вахтасына» аттанған алғашқы қазақстандық іздеушілер болды. Экспедиция «Даңқ жолы» халықаралық патриоттық жобасы аясында ұйымдастырылды.
Хабар-ошарсыз кеткендерді іздестіру жұмыстары соғыс жылдары стратегиялық көпір болған Молдова Республикасының Новоаннен ауданында жүргізілуде. Оның жанында өшпес ерлік көрсеткен қазақстандық жауынгерлерге арналған гранит ескерткіші орнатылады.
