Беймәлім індет әуелі Ақкөл ауданына қарасты Азат ауылында тіркеліпті. Бірлі-жарым емес, 400-ден аса ірі қара түгел індетке шалдыққан. Он шақтысы өліп те қалған. Ауыл тұрғындарының айтуына қарағанда, індетке шалдыққан малдың аузы уылып, тілі сабақтап, демігіп қалады екен. Мал дәрігерлері әртүрлі ем қолданғанымен, қайыр болмай тұр.
«Сиырымның аузынан көбік аралас су ақты. Аяғына жара шығып, баса алмай қалды», дейді Азат ауылының тұрғыны Тұрсынхан Әмірханұлы.
Ал іргедегі Қарабұлақ ауылында 130-ға жуық ірі қара мал дәл осындай індетке шалдығып отыр. Мал сүмесімен күн көріп отырған ауыл адамдары үшін бұл – үлкен соққы. Осы елді мекен тұрғындарының айтуына қарағанда, мал дәрігерлері әрқайсысы 2,5 мың теңге тұратын екпе еккен. Нәтижесі көңіл көншітпейді. Қан алғанымен, анықтауы ұзаққа созылып кетті.
Мал індетке шалдыққан соң оның сүтін пайдаланудан ел қауіптеніп отыр. Бұрын-соңды малсақ қауымның назарына ілікпеген, төтеннен келген індеттің жұқпалы емес екеніне кім кепіл?
«Біздің қолдан келер қайран жоқ. Індет белгісі пайда болғалы абдырап қалдық. Дәрі-дәрмегі де табылмай тұр», дейді мал дәрігері Олжатай Фазылов.
Зертханаға жіберілген сынамалардан нақты нәтиже шығарылмаған. Маманның уәжі осындай. Ал малсақ қауым бес бірдей ауылдың малы белгісіз індетке шалдыққан соң алаңдаулы.
Ақмола облысы
