![Адалдықты мұрат еткен](/media/2021/07/23/crop-3_5_921x1167_politsiya-polkovnik.jpg)
«Әкеміз ұл-қыздарын еңбекке баулыды. Жұрттың ала жібін аттамауды санамызға сіңірді. Қазір қарашаңырақта отырған анам үй шаруасында болса да ақылды еді. Әкені қалай қадірлеу керектігін анамыздың арқасында білдік. Ала таңнан қас қарайғанша, кейде тіпті бірнеше күн бойы үйде болмайтын, жұмысымен жүретін әкеміздің қабағына қарап өстік», дегенді жиі айтады Рахымберді Дулатұлы.
Ол тәртіп сақшысы болатынын әу бастан білген. «Әлі есімде, бала кезімнен жол полицейі болуды армандайтын едім. Біздің аймақта құм көп, қолға түскен заттарды сым темірмен бір-біріне байлап, бала қиялмен көлікке ұқсатып алатын едік. Шашылып жатқан дүниелерден МАИ бекетін тұрғызып аламын, өзге балаларға МАИ инспекторы болатынмын», дейді полиция полковнигі балдәурен бала кезін еске алып.
Отан алдындағы әскери борышын орындап қайтқан Рахымберді білімсіз болашақ бұлыңғыр екенін жақсы түсініп, керек құжаттарын алып, Алматыға жолға шығады. Сол кездегі В.И.Ленин атындағы Қазақ политехникалық институтын және көршілес Қырғыз еліндегі И.Арабаев атындағы университетті «Жол қозғалысын реттеу» мамандығы бойынша бітірді.
Бұл кез – экономикалық дағдарыс жылдары болғандықтан уақытша болса да әртүрлі шаруаларды атқаруына тура келді. «Білімім мынадай» еді деп таңдаған мамандық негізінде қызмет іздейтін кез емес.
Оның бала арманы еліміз өтпелі кезең қиындықтарын еңсеріп, ес жия бастаған тұста ғана орындалды. 1997 жылы ол Алматы облысы жол полиция бөлімінің аға инспекторлығынан бастап, адал еңбегімен, зор жауапкершілігімен көзге түсіп, облыстық жол полициясы бастығының орынбасары лауазымына дейін көтеріледі. Айналасы он жылдың ішінде білімін шыңдап, біліктілігін қайрап, Павлодар облысы жол полициясы басқармасының бастығына дейін жоғарылады. Ал кейінгі үш жылдан бері Жамбыл облысы Жергілікті полиция басқармасының бастығы қызметін атқарып жүр.
Рахымбердінің еңбек жолы қызметіне байланысты есте қаларлық оқиғалардан кенде емес. Талай қылмысты ізін суытпай ашты. Қиын да күрделі істердің басы-қасында болды.
Енді ғана полиция қызметіне кірісіп жатқан кезі. Жас маманға ең ауыр іс – жол бойында адам қағу фактісі тіркеліп, кінәліні табу, болған төтенше оқиғаның мән-жайын анықтау тапсырылады. Адам өліміне қатысты істі жүргізу қанша қиынға соқса да, ақыры қылмыскерді қолға түсіреді.
«Көрші ауданнан газ таситын мекемеге жаңа «ЗИЛ» ауыр жүк көлігі келген екен. Әлі мемлекеттік тіркеуге тұрмаған. Газ таситын мекеме өз ұжымы ішінен бір жүргізуші тағайындап, нөмірі жоқ жаңа машинаны бекітіп береді. Осы жерде жүргізушіге арам ой келіп, бұзылып тұрған ескі көліктің нөмірін шешіп алып, жаңа «ЗИЛ» көлігіне тағып алған. Сонымен көрші аудандағы бажасына барып, ішімдік ішіп, тойлап, күн бата ел көзіне түспейін деп жолға шығады. Осы жолда рульге мас күйінде отырған жүргізуші жол шетінде кетіп бара жатқан адамды басып өлтіреді. Оның кім екенін анықтау оңайға түскен жоқ», деп еске алады Р. Әшкеев.
Ал бұл кезде тергеушілер күдікті ретінде басқа көлікті тұраққа қойып, жазықсыз бір жүргізушіні алқымнан алып жатқан. Жауапқа тартылған адамның бар кінәсі – жол бойындағы тексеру кезінде қайтыс болған адамның қасында суретке түсіп қалғаны. Демек, жазықсыз жапа шегетін түрі бар.
Рахымбердінің түйсігі алдамаса, кінәлі ол емес. Әрі қарай іздестіру жұмысын жалғастыра береді. Газ таситын мекемеге қайта-қайта барып жүріп, осы жақтан бір іліктің табылатынына іштей сенімді. Өйткені бір адам жол бойында осы мекемеге тиесілі ауыр жүк көлігін көргенін айтқан. Ол жүк көлігі бортының алдыңғы жағындағы жоғарғы екі шетінде қызыл жалау бар дегені есінде қалған. Ол кезде газ таситын машина солай жабдықталатын. Сонымен бірнеше мәрте барып, жаңадан келген «ЗИЛ» машинасының алдыңғы бампері мен капотында аздап майысқан із қалғанын байқайды. Қоярда қоймай сараптама жасатып, ақыр соңында қылмысқа қатысты жүргізушіні табады.
Тергеу кезінде жүргізуші өз кінәсін мойындады. Сот оны 8 жыл бас бостандығынан айырды. Осы аралықта күдікті деп танылған адам қамаудан босатылды.
Полиция полковнигі мұндай оқиғалардың талайын көрген, талай іс-шараға жетекшілік жасап, көптеген қылмыстың дер кезінде бетін ашқан. Осындай абыройлы қызметі үшін Тәуелсіздігіміздің 10, 20, 25 жылдығына байланысты мерекелік медальдармен марапатталған. Ішкі істер министрінің қолынан «Ең үздік қызметкер» құрметті атағының төсбелгісін алған.
Жамбыл облысы Жергілікті полиция басқармасының басшылығына Рахымберді Дулатұлы келгелі полицияға деген халықтың сенімі арта түсті деуге болады.
«Мен өз әріптестерімді адал болуға, халық игілігіне қызмет етуге, полицей атына кір келтірмеуге үндеуден жалыққан емеспін. Өзім де сол үдеден шығуға бар күш-жігерімді салып келемін. Өмір бойы сол мұраттан танған емеспін. Менің кәсібімнің қиындығын отбасым да біледі. Әр кез қолдау танытып, түсіністікпен қарайды. Менің қызметімнің қаншалықты қиын екендігін көріп өскендіктерінен бе екен, әйтеуір, екі ұлым құқық қорғау саласына жақындаған жоқ. Өздері таңдаған мамандықтармен айналысып, елге қызмет жасап жүр», деп ағынан жарылды полиция полковнигі.
Жанкелді АМАНКЕЛДІҰЛЫ