Сайлау • 26 Шілде, 2021

Өз таңдауын жасады

23 рет көрсетілді

Ел Президентінің саяси реформалар пакетінің негізгі бағыттарының бірі – ауыл әкімдерінің сайлауына Ақтөбе облысының ауыл тұрғындары ерекше белсенділікпен қатысты.

Баян ҚУАНДЫҚҚЫЗЫ

Сайлаушылар 74 сайлау учаскесінде Аққұдық ауылы мен 34 ауылдық округ әкімдерін таңдады. Әйтеке би, Қарғалы, Мәртөк, Шалқар, Хромтау аудандарының сайлаушылары аса белсенділік танытты.

Сондай-ақ ауыл әкімдерін сайлау кезінде қоғамдық қауіпсіздікті сақтауға облыс бойынша 196 полиция қызметкері жұмылдырылды. Олардан басқа, 74 полиция қызметкері облыс орталығынан 12 ауданға сайлау учаскелеріне бюллетеньдер жеткізуге қатысты.

Алға ауданының Тоқмансай және Үшқұдық ауылдық округтерінің әкімі болуға 6 кандидат таласқа түсті. Байғанин ауданының Көлтабан, Сартоғай, Қызылбұлақ ауылдық округтері мен Әйтеке би ауданының Т.Жүргенов, Әйке, Жамбыл, Үшқатты, Тұмабұлақ, Аралтоғай, Қайрақты ауылдық округтерінің әкімі болуға бір орынға үш кандидаттан келген.

Мұғалжар ауданындағы 1225 тұрғыны бар Қайыңды ауылдық округінің әкімі болуға сайлауға үш кандидат түсті. Олар «Ақжол» демократиялық партиясынан – Джали Абдиев, Nur Otan партиясынан – Нұрболат Жалғас және өзін өзі ұсынған Руслан Төребеков. Жексенбі күні осы округке кіретін Алтынды және Қайыңды елді мекендерінің 712 сайлаушысы оларға таңдауын жасады.

Қобда ауданының И.Құрманов атындағы, Сарбұлақ, Талдысай, Жарсай, Терісаққан ауылдық округтерінің сайлаушылары 8 учаскеде дауыс берді.

И.Құрманов атындағы ауылдық округ ақсақалдар кеңесінің төрағасы Жәнібек Анишов Егіндібұлақ елді мекеніндегі орта мектепте орналасқан №443 сайлау учаскесіне таңертеңгілік уақытта келіп дауыс берді. Ақсақал ауыл әкімі істің көзін таба білетін шебер ұйымдастырушы бола білуі керек деген пікірде.

«Ауыл әкімін үлкен жұмыс күтіп тұр. Биылғы қуаңшылық елге оңай тиген жоқ. Қысқа дайындық, отын-су әзірлеу, жұмыссыздарды кәсіптік бағдар беру курстарына жіберу, жас мамандар тарту, көгалдандыру сияқты қыруар жұмыстарды үздіксіз жүргізу керек. Тек сонда ғана жұмыстың нәтижесі көрінеді. Ауылда ерінбеген адамға табыс көзі көп. Осы жағынан ауыл ақсақалдары сайланған әкімге қолдан келген көмегімізді береміз», дейді Егіндібұлақ елді мекенінің тұрғыны Ж.Анишов.

«Партиялық емес байқау орталығы» республикалық қоғамдық бірлестігінің Ақтөбе облыстық филиалының төрағасы Ерәділ Үббіниязовтың хабарлауынша, Ақтөбе облысында өтіп жатқан ауыл әкімдері сайлауын 500-ге жуық байқаушы қадағалады. Олардың ең көбі Әйтеке би ауданында тіркеліпті. Осы аудандағы жеті округ әкімі сайлауын 150 байқаушы қадағаласа, Байғанин мен Қобда аудандарында 80, өзге аудандарда 10-30 байқаушыдан тіркелген.

Ақтөбе облысы