Үшінші жарыс күні: үшінші қола

Чиншанлодан – алтын, Жансай Смағұловтан қола медаль күткенбіз. «Түйе сұрасаң, бие береді», демекші қоржынымызға қола медаль түсті. Қола медальдің иесі – Зүлфия Чиншанло.

Сегіз жыл күткен жүлде

Ауыр атлетикадан 55 килода бақ сынаған Зүлфия жұлқа көтеруде бірінші мүмкіндігінде 90 килоны бағындыра алды. Ал екінші мүмкіндігінде 93 ки­лоға тапсырыс беріп, оны да басы­нан асырған. Алайда төрешілер алға­шында есептегенімен, кейіннен ақыл­даса келе есепке алмады. Ал үшінші мүмкіндігінде жерлесіміз тағы да 93 килоны көтергенімен, үш төреші де қызыл түймені басты. Осылайша, соң­ғы орындардың қатарында тұрған Зүл­фияның жүлдегер қатарынан көрінуінен күдер үзе бастадық. Сөйтсек, бекер екен.

Зүлфия серпе көтеруде бастапқыда 123 ки­лоға тапсырыс беріп, оны екінші мүм­кіндігінде басынан асырды. Сөйтіп ол үшінші мүмкіндігін пайдаланбай-ақ, үшінші орынға табан тіреді.

2012 жылғы Лондон Олимпиадасында чемпион атанған Чин­шанло, кейіннен допинг дауына ілігіп Олимпиада ме­далінсіз қалып еді. Одан қалса, Рио Олимпиадасына қатысу құқығынан айырылды. Осындай қиындықтарға қарамастан, Зүлфия сағы сынбай араға сегіз жыл салып Олим­пиаданың жүл­дегері атанып отыр. Осы­лайша, Токио Олимпиадасына сынға түскен екі зілте­міршіміз де қола ме­дальға ие болды.

Бұл салмақта алтын медальді Олим­пиада рекордын тіркеген Филип­пин өкілі Хидилин Диас (224 кг) ен­шілесе, күмісті қытайлық Ляо Кюн (223 кг) иеленді.

Ендігі үміт – Еленада

Токио татамиіндегі бәсекенің жоғары екенін дзюшылардың белдескенінен-ақ білуге болады. Татамиге шыққанның барлығы жеңіс үшін барын салып жат­қаны байқалады. Жүлдеден үмітті Жансай Смағұлов та екінші іріктеу кезе­ңін әдемі-ақ бастады. 73 килоға дейінгі салмақта сынға түскен ол ар­мениялық Фердинанд Карапетянды жеңді. Белдесудің негізгі уақыты тең аяқталып, қосымша уақытта Жансай «вазари» ұпайын еншіледі. Кәдімгідей қуанып қалдық. Жүлде алса, нақ осы Смағұлов алады дестік. Себебі, бұдан жеңілген армян дзюдошысы атағы дардай Еуропа чемпионы. Әйткенмен Смағұлов үшінші айналымда канадалық Артур Маргелидоннан айласын асыра алмады. Маргелидон Grand Slam, Grand Prix турнирлерінде үнемі үздік үштіктен көрініп жүрген әккі спортшы. Мұнда да белдесудің негізгі уақыты тең аяқталып, жеңімпаздар қосымша уақытта анықталды. Бірінші болып «вазари» ұпайын алған Канада өкілі келесі айналымға өтті.

Есесіне қыздар арасында теннистен жалғыз өзі қалған Елена Рыбакина жарады. Қазақстандық теннисші екінші айналымда Швеция өкілі Ребекка Пе­терсонмен кездесіп, екі сетке созылған матчта 6:2, 6:3 есебімен жеңіске жет­ті. Кездесу 1 сағат 14 минутқа со­зыл­ды. Бұған дейін За­рина Диас, Ярослава Шведова және Юлия Путинцева күннің ыстығына, жарақатына байланысты жарысты жалғастырудан бас тартқан болатын. Енді бар үміт – Рыбакинада.

Ал Олимпиадаға стенд ату үшін кел­ген мерген қыздар елге ерте қайта­тын­дардың тізімін толықтырды. Екі күнге созылған бәсекеден кейін Әсем Орынбай мен Зоя Кравченко бастаған мергендер келесі кезеңге өте алмады.

«Скит» жаттығуы бойынша сынға түскен олар бес раунд бойы іріктеу кезеңін өткізді. Іріктеу нәтижесі бойынша алты спортшы ғана келесі айналымға өтеді. Өкінішке қарай, Зоя Кравченко 113 ұпаймен 22-орын алса, Әсем Орынбай 111 ұпаймен 26-сатыда қалып қойды.

Бибосынов келесі кезеңге өтті

Бокстан ерлер арасында бәсеке қыза түсті. 52 кило салмақта рингке шық­қан Сәкен Бибосынов Пуэр­то-Рико өкілі Янкьель Ривера Фи­героамен жұдырықтасып, 4:1 есебі­мен басым түсті. Сәкеннің келесі қар­сы­­ласы Ека­теринбургте өткен әлем чем­пио­натының қола жүлдегері, француз Билал Беннама болмақ.

Садақ атудан Қазақстан ерлер құра­масы командалық сайыста жеңіліс тапқанымен, олар енді жекелей сында өнер көрсетеді. Садақшылардан жасақталған ерлер құрамасы командалық сайыста Үндістан құрамасына қарсы шығып, қарсыластарына 2:6 есебімен есе жіберді. Командалық бәсекеде ел құрамасы сапынан жарыс жолына Сан­жар Мұсаев, Ильфат Абдуллин және Денис Ганкин шықты. Садақ атудан жекелей жарыстың келесі айналымы 27 және 29 шілде күндері өтеді.

Слаломды есуден финалға шыққан споршылар қатарында қазақстандық Александр Куликов жоқ. Жартылай финал қорытындысы бойынша Ку­ликов 12-орын иеленді. Финалға өту үшін алғашқы ондыққа ену керек еді. Осылайша, қазақ­стандық спорт­шы жарысты аяқтады. Әйел­дер ара­сындағы сында Екатерина Смирнова да іріктеу кезеңінен өте алған жоқ. Үс­тел теннисінен Қазақстан коман­да­сының үздігі Кирилл Герасименко екінші айналымда гер­ма­ниялық Тим Боллмен кездескен болатын. Тартысты жекпе-жектің алғашқы партиясын Кирилл жеңіспен аяқтаған. Алайда кейінгі төрт партияда неміс спортшысының шеберлігі басым болды. Нәтижесінде, кездесу 1:4 есебімен қарсыластың пайдасына шешілді.