Әлем чемпионаттарында үш рет жүлдегер атанған жерлесіміз жабық ғимаратта өткен әлемдік додада да дәл осындай жетістікке жеткен. Рыпакова 2010 жылы Хорватияда өткен турнирде үш қарғып секіруде 15,25 метрге секіріп, Азия рекордын жаңартты. Бүгінге дейін бұл рекордты сары құрлықта ешкім бұза алмай келеді.
Ольганың халықаралық аренаға көтерілуі 2000 жылдың 17 қазанында басталды. Содан кейін Рыпакова Чилиде өткен жасөспірімдер арасындағы әлем чемпионатына қатысты. 2002 жылы Ямайкада өткен әлем чемпионатында күміс жүлдегер атанды. Міне, бүгінге дейін 20 жыл бойы еткен еңбектің арқасында жоғарыда айтқан жүлделерге ие болды.
Пандемияға байланысты Олимпиада чемпионы соңғы екі жылда жарыстарға көп шыққан жоқ. Биыл Дохада өткен «Гауһар лигасы» кезеңіне қатысып, өз деңгейін бір байқады. Содан бері оны үлкен додалардан көре алмадық.
Токиодағы ойындарға келетін болсақ, белгілі бір нәтижені болжау мүмкін емес. Егер Рыпакова 15 метрге секірсе, онда жеңіске деген мүмкіндік арта түседі. Тіпті биік тұғырдан көріп қалуымыз да ғажап емес. Бүгінде үш қарғып секіруден венесуэлалық Юлимар Рохас 15,43 метрге секіріп, әлемдік рекорд орнатқанын ескерсек, Ольга үшін алтын медальдің ауылы алыс секілді. Ал «күміске» немесе «қолаға» қол жеткізуге жерлесіміздің мүмкіндігі бар.
Бүгін – Рыпакованың жарыс жолына шығатын күні. Олимпиада алдында «бар күш-жігерімді саламын» деген Ольга тым болмаса үздік үштіктен көрінсе екен деп тілейміз.
