TOKYO2020 • 01 Тамыз, 2021

Жеңілістен көз ашпай келеміз...

518 рет көрсетілді

Токио төрінен алтын медаль, тіпті күміс медаль қоржынымызға қашан түседі деп жүргенде халқының саны 33 мыңнан сәл ғана асатын Сан-Марино елінің спортшылары 1 күміс, 1 қола медаль жеңіп алды. Олим­пиадаға бес-ақ спортшысымен келген санмаринолықтар үшін бұл – үлкен жетістік. Ал 97 спортшысымен келген біздің құрама үшін ойланатын мәселе. Сенген спортшыларымыз жарысты ерте аяқтап жатыр.

Бүгін күрес түрлерінен бәсеке басталды. Әйелдер арасында 76 килоға дейінгі салмақ дәрежесінде Қазақстан намысын Эльмира Сыздықова қорғаған болатын. Өкінішке қарай, алғашқы белдесуде Эльмира қырғызстандық Айпері Медетқызынан 2:8 есебімен ұтылды. Бұл біз үшін күтпеген жағдай болды. Себебі Рио Олимпиадасының қола жүлдегері Эльмира Олимпиадада басты фавориттердің бірі еді.

Олимпиадада олжа салады деген әлем чемпионатының қола жүлдегері Мейрамбек Айнағұлов та қырғызстандық балуанға еш қарсылық көрсете алмады (0:8).

Ел мақтаған Елена Рыбакинаның Токиодағы соңғы ойынын көрдік. Теннисші қызға соңғы сәтте және соңғы сетте психологиялық дайындық жетіспеген сияқты(Есеп – 6:1, 6:7, 4:6). Қола медаль үшін өткен сайыста украиналық Элина Свитолинадан екінші сетте жеңілген соң үшінші сетке күші жетпеді. Бірақ сабырлылығы ұнады. Жеңсе де, жеңілсе де сол қалпы. Нағыз кәсіби спортшы. Әлемдік рейтингте үздік жиырмалықтың ішінде жүрген қазақстандық теннисші келесі Олимпиадада топ жаруы әбден мүмкін. Ал алда Елена US Open додасына қатысуды жоспарлап отыр.

«Өте ауыр матч. Есепте тағы да алда тұр­дым, көп жағдайда ойынды сәтті аяқтау қиынға соқты. Физикалық және психологиялық тұрғыдан қиын болды. Бүгін қолымнан келгенше бәрін істеуге тырыстым, бірақ сәттілік жетіспеді. Кортқа шығар алдында аздап ауырып қалдым. Жалпы алғанда, бұл жақсы ойындарға толы керемет апта болды. Мен үшін үлкен тәжірибе болғаны анық. Әрине, жанкүйерлер қатыспағандықтан, корттағы атмосфера мүлде басқа. Парижде өтетін келесі Олимпиадаға қатысамын деген ойдамын», деді теннисші.

Спорттық гимнастикадан еркін жаттығуда бесінші орын алған Милад Каримидің жүлде алуға мүмкіндігі бар еді. Жаттығу кезінде ол үш рет қателесті. Милад орындаған жат­ты­ғудың қиындық коэффициенті – 6,400 ұпай. Ал қола медаль алған қытай спортшысы Cяо Жотеннің қиындық коэффициенті – 6,200 ұпай. Бірақ Милад қиындық коэффиценті жоғары болса да, жаттығуында қате жіберді. Ал Қытай спортшысы аз коэффициентті таза орындап, медаль алып кетті. Милад 22 жас­та. Жарақаттан аман болса, Париж Олим­пиа­дасында жүлде алатын бірден-бір үміткер болатыны анық.

Ширек финалға дейін жеткен төрт бокс­шымыздың екеуі кеше жартылай финалдық айқасқа шықты. 75 килодағы Әбілхан Аманқұл бразилиялық Эберт Консейсан Соузамен кездескен болатын. Өкінішке қарай, Әбілхан Олимпиаданың медаліне қол жеткізе алған жоқ. Тартысты өткен бәсекеде бразилиялық боксшы 3:2 есебімен басым түсіп, жартылай финалға өтті. Ал аса ауыр салмақта Қамшыбек Қоңқабаев ресейлік Иван Верясовпен кездесіп, жерлесіміз 5:0 есебімен жеңіске жетті. Жартылай финалда Қамшыбек Қоңқабаев америкалық Ричард Торреспен кездеседі.

Айта кетейік, бұрнағы күні Сәкен Бибо­сынов (52 кг) пен Зәкір Сафиуллин (63 кг) ширек финалға жолдама алды.

Академиялық есуден Токио Олимпиа­дасына қатысқан жалғыз қазақстандық спорт­шы Владислав Яковлев жазғы ойындарды 19-орынмен аяқтады. Сондай-ақ са­дақ атудан ерлер арасында жекелей сын­ның 1/8 финалында Ильфат Абдуллин қытай­лық Ли Джуа Лунге 5:6 есебімен жол берді. Қазақстандық жеңіл атлет Михаил Литвин Токио Олимпиадасында 400 метр қашық­тыққа жүгіруден жартылай финалға шыға алмады. Михаил Литвин өзінің тобында 47:15 нәтижесімен 7-орын алды. Су добынан Қазақстан құрамасы Токио олимпия ойында­рында Черногория құрамасына қарсы ойын өткізіп, 12:19 есебімен ұтылды. Айта кетер­лігі, су добынан Қазақстан құрамасы осыған дейін Хорватия (7:23), Сербия (5:19) және Испании (4 :16) құрамаларына жол берді.

Соңғы жаңалықтар

Еңбек – бейнет емес, зейнет

Қоғам • Бүгін, 08:46

Қуатовтың қолтаңбасы

Қоғам • Бүгін, 08:36

Астық жинау қашан аяқталады?

Экономика • Бүгін, 08:33

Дендеген дерттің беті қайтар емес

Коронавирус • Бүгін, 08:30

Бас прокурорлар бас қосты

Саясат • Бүгін, 08:19

Қош бол, Америка!

Әдебиет • Кеше

Смартфонға сыйған сауда

Технология • Кеше

Қарымды қаламгер

Руханият • Кеше

Халықаралық кездесулер

Қазақстан • Кеше

Ұқсас жаңалықтар