«Шағын және орта бизнесті дамыту - экономиканың тұрақтылығын қамтамасыз етудегі маңызды факторлардың бірі. Бірінші жартыжылдық қорытындысы бойынша «Қарапайым заттар» Экономикалық бағдарламасы аясында 142 миллиард теңгенің 334 жобасы қаржыландырылды. Ағымдағы жылдың соңына дейін 424 миллиард теңгенің 724 жобасын қолдау жоспарланып отыр», деді Асқар Мамин Үкімет отырысында.
Оның айтуынша, ағымдағы кезеңде «Бизнестің жол картасы - 2025» бағдарламасы бойынша жалпы сомасы 492 миллиард теңгеге 23 мыңға жуық жоба қолдау тапты.
«Ағымдағы жылдың соңына дейін құны шамамен 1,2 трлн теңгені құрайтын 32 мыңға жуық жобаға қолдау көрсетіледі. Осы екі бағдарлама аясында 90 мыңға жуық жұмыс орны ашылады. Кәсіпкерлікті қолдаудың ең сұранысқа ие бағыттары - сауда, қызмет көрсету, өндіріс, көлік және қоймалау, сондай-ақ құрылыс», деді Премьер-Министр.
Бүгінгі күні бағдарламалар аясында кәсіпкерлерді қолдауға бағытталған 1 теңге субсидия салық түрінде алты еседен астам сомада бюджетке қайтарылады.
«Үкіметтің «Атамекенмен» бірге қабылдаған пандемия жағдайында бизнесті қолдаудың дағдарысқа қарсы шаралары өзінің тиімділігін көрсетті. Осы бағдарламалар аясында жоспарланған шаралар жыл соңына дейін толық орындалуы тиіс», деп қорытындылады Үкімет басшысы.
