Үздік ондықтың көшін «Отбасы банк» бастап тұр. Жинақ банкінің өсімі 34,8 пайызға көтеріліп, 335,8 млрд теңге болыпты. Сондай-ақ үздік үштікте АТФ Банк (+29,5 пайыз) пен «Альфа Банк» (+24,7 пайыз) бар. Еске салайық, АТФ Банк былтыр жыл соңында Jusan Bank-пен бірігіп кеткен еді, дегенмен процесс әлі жалғасуда.
Банк активтері 20,9 пайызға өсіп, 34,04 трлн теңгені құраған. Finprom жобасының жазуынша, бұл да банк секторының тұрақтылығын көрсетеді. Активтер көрсеткіші бойынша да бірінші орында – «Отбасы банк» (2,33 трлн теңге). Бұл ретте «Сбербанк» (+52,5 пайыз) пен Kaspi Bank-тің де (+27,8 пайыз) үлесі мол. Активтер көлемі бойынша үш банкті рейтингтің антилидерлері деп атауға болады. Олар – АТФ Банк, Capital Bank және қытайлық ICBC еншілес банкі. АТФ жыл басынан бері 36 млрд, Capital Bank 4,5 млрд және ICBC 1,7 млрд теңге жоғалтқан. Capital Bank-тің маусым айында лицензиясынан айырылғаны белгілі. Сондықтан бұл қаржы институты секторлық статистикада соңғы рет бой көрсетіп отыр. Ал АТФ жыл соңына дейін Jusan-мен толыққанды қосылып бітуі тиіс, содан кейін нарықтан біржола кетеді.
«Қазақстандық банктер «коронадағдарысқа» қарамастан займ беруді тоқтатқан жоқ. Бір жылда екінші деңгейлі банктердің қарыз портфелі 11 пайызға өскен, 16,73 трлн теңгені құраған. Дегенмен барлық қаржы ұйымдары бірдей несие белсенділігін сақтай алмай отыр. Сектор бойынша тек 17 банк оң көрсеткішке ие. Дағдарысқа толы қиын кезеңде ипотекалық сегмент – несие нарығының драйверіне айналды, ал «Отбасы банк» қарыз портфелі бойынша алда тұр. Бір жылда 43,8 пайызға өсім көрсетіп, 1,51 трлн теңгеге жеткен. Тағы да «Сбербанк» пен Kaspi Bank қарыз портфелі тұрғысынан «Отбасы банктен» кейінгі екінші, үшінші орындарды бөліседі» деп жазады Finprom. Capital (NPL 90+ үлесі 88,5 пайызды құрайды), Jusan (54,9 пайыз) және «Еуразиялық банктің» (9,2 пайыз) портфель сапасы едәуір нашарлай түскен. Нарықтан кеткен Пәкістан банктің орнын басқан «Еуразиялық банк» мұндай антирейтингке алғаш рет еніп отыр.
Салымдар бойынша жылдық өсім – 25,4 пайыз. Салым көлемі 23,83 трлн теңгеге жетті. Салымшылар қаржысын жинақтау бойынша RBK Bank алғашқы орында. Бұл банк салымдарын бір жылда екі еселеп, 709,9 млрд теңгеге жеткізген. Екінші орындағы «Отбасы банк» салымы бір жарым есе көбейсе, «Сбербанк» салымдары 43,2 пайызға артқан. Ал бөлшек салымдар бойынша халықтың баспанаға деген бар қаржысын жиып отырған «Отбасы банкпен» ешкім теңдесе алмайды. Бұл қаржы ұйымындағы салымдар мөлшері 1,36 трлн теңгеге тең. Одан кейін Kaspi Bank (+37,8 пайыз) және «Банк ЦентрКредит» (+26,8 пайыз).
