– Командамыздың көшбасшысы Мейрамбек Айнағұлов спортшылардан бірінші болып кілемге шыққандықтан психологиялық тұрғыдан дайын болмаған сияқты. Оның қарсыласы солақай. Соған байланысты өзімізге ыңғайлы болатындай күрес стилін түсіндіріп, оған жеткізгенімізбен, барлығы бекер болды. Тапсырмамызды кілемге шыққанда орындаған жоқ. Сондай болмашы қателіктің кесірінен командамыздың көшбасшысы қарсыласына есе жіберді, – деген бас бапкер Демеу Жадыраевтың жапон балуанынан қалай жеңілгенін де айтып берді. – Демеу ұпай санымен алда тұрған. 30 секундтық үзілісте басын төмен қаратпай, барлық сәтті бақылауға алу керегін айтып, бәрін түсіндіргенбіз. Бірақ Демеудің дәл осылай соңғы сәтте болмашы әдіске түсіп, қарсыласына ұпай сыйлағанын біз де түсіне алмадық, – деді Б.Байсейітов.
Сондай-ақ Бақтияр Бағашарұлы 87 килода жарыс жолына шыққан Нұрсұлтан Тұрсыновқа төрешілер әділетсіздік жасады дейді.
– Төрешілер тарапынан бағалау дұрыс болмады. Бірінші болып партерге біздің балуанды қойды. Екіншісінде неміс балуаны жатты. Сол кезде Нұрсұлтан тік тұрып жартылай әдіс жасап лақтырғанымен, төрешілер оның екі ұпайын есепке алмады. Ереже бойынша толық жасалмаған әдіске екі ұпай берілуі керек. Мен төрешілер шешіміне шағым түсіргенде (челлендж) белдесуді қайта қарап, шешімді өзгерткен жоқ. Әдетте шағым қанағаттандырылмаса, қарсыласқа бір ұпай беріледі. Бас төреші, төрешілер үйлестірушінің ұлты – неміс. Осы жерден өздеріңіз қорытынды жасай берсеңіздер болады. Егер де екі ұпайды Нұрсұлтанның еншісіне жазғанда, келесі кезеңге өтер едік. Бұл жерде жеңісті тартып алды деп есептеймін, – деді Б.Байсейітов.
Өз кезегінде грек-рим күресінен әлем чемпионы Бақтияр Байсейітов елден кешірім сұрап, алдағы жоспарын бөлісті.
– Мен 2019 жылдың бел ортасынан құраманың бас жаттықтырушысы қызметіне кірістім. Аз уақыттың ішінде балуандарды даярлап, сол жылы Нұр-Сұлтан қаласында өткен әлем чемпионатында бақ сынадық. Онда біз бір күміс, екі қола медаль жеңіп алдық. 2020 жылы Азия чемпионатында 1 алтын, 1 күміс және 3 қола жүлдеге ие болдық. Биылғы Азия чемпионатында 2 алтын, 2 күмісті еншіледік. Соған қарамастан, Олимпиадада сәтсіз өнер көрсетіп отырмыз. Жеңіліс үшін жерлестерімнен кешірім сұраймын. Олимпиада есебін елге барғаннан кейін толыққанды беретін боламыз. Егер де барлығы дұрыс болса, күзде өтетін әлем чемпионатына дайындықты бастап кетуіміз керек, – деді бас бапкер.
