Фото: Владислав Семенов, Қазақстан ҰОК
Токио Олимпиадасындағы төменгі көрсеткіштері үшін спорт басшылары мен бапкерлердің мәселесі әлі талай май шаммен қаралатыны анық.
Жарысқа келер болсақ, кеше финалдық айқас үшін Қазақстан боксшылары арасында жалғыз өзі қалған Сәкен Бибосыновқа (52 кг) ел үміт артқан еді. Өкінішке қарай, ұлыбританиялық Джалал Яфаиға қарсы қолғап түйістірген жерлесіміз төрешілер шешімімен жеңіліс тапты.
Бірінші раундта Сәкеннің қарсыласы ә дегеннен-ақ лап қоя берді. Мұндайды күтпеген отандасымыз да қарап тұрсын ба?! Ол да алға ұмтылды. Ашық «шайқасқа» ұласқан кездесуде Сәкен бірнеше соққыны өткізіп алды. Тіпті нокдаун да тіркелді. Ал екінші және үшінші раундта белсенділік танытып, қарсыласына бірнеше соққы жасағанымен, қорытынды есеп бойынша 3:2 есебімен ұлыбританиялық боксшы жеңіске жетті. Осылайша, тұңғыш рет Олимпиаданың финалы қазақстандық боксшыларсыз өтеді.
Журналистер алдына шыққан Сәкен көпке дейін өз-өзіне келе алмай, көз жасына ерік берді: «Токио Олимпиадасында жеңіске жетіп, қазақ халқын алтын медальмен қуантқым-ақ келіп еді. Ол арманыма жете алмадым. Бар күш-жігерімді салдым. Соңына дейін жұдырықтастым. Бірінші раундта қарсыласым басым түсті. Оны мойындаймын. Ал қалған екі раундта аянып қалғаным жоқ. Бұл менің бірінші Олимпиадам. Тіпті Токиоға бара алмай қалуым да мүмкін еді. Жолдаманы ең соңғы сәтте жеңіп алғанымды білесіздер. Сондықтан бәріне қанағат. Жүлдемді барша қазақстандықтарға арнаймын», деді Бибосынов.
Алтыннан тағы бір үміткеріміз каратэден 67 килоға дейінгі салмақта сынға түскен Дархан Асәділов еді. Амал не, Дархан да Олимпиаданың қола жүлдесін қанағат тұтты. Жерлесіміз А тобында сынға түсіп, барлық қарсыласынан басым түсті. Ал жартылай финалда Франция өкілі Стивен де Костамен кездесіп, 5:2 есебімен жеңіліп қалды. Дархан каратэ тарихында Қазақстаннан шыққан тұңғыш Олимпиада жүлдегері. Дарханның негізгі салмағы 60 кило. Олимпиадада 60 кило салмақ болмағандықтан, жерлесіміз өзінен әлдеқайда үлкен 67 килода сынға түскенін айта кету керек. Сондай-ақ қыздар арасында 55 килода сайысқа түскен Мөлдір Жаңбырбай Олимпия ойындарының жартылай финалына өте алмады. Мөлдір В тобында сынға түсіп, екі кездесуде жеңілсе, бір кездесуде тең түсті. Ал бір жекпе-жекті жеңіспен аяқтады.
Еркін күрестен 57 килоға дейінгі салмақта белдескен Нұрислам Санаев алтын алу керек еді. Қарсыластарының барлығын жеңіп келген ол жартылай финалда Үндістан балуаны Рави Кумарға есе жіберді. Қола медаль үшін күресте Санаев намысты қолдан берген жоқ. Кіші финалда болгариялық Георгий Вангеловтен 5:1 есебімен басым түсіп, жүлдегерлер қатарынан көрінді. Ал 74 килоға дейінгі салмақ дәрежесінде белдескен Данияр Қайсанов бұл күні үш қарсыласынан басым түсіп жартылай финалға жолдама алған-ды. Финалдық айқас үшін Қайсанов екі дүркін әлем чемпионы, ресейлік Заурбек Судаковпен белдесіп, 0:11 есебімен жеңіліс тапты.
Аса ауыр салмақта белдескен Юсуп Батырмурзаевтың жолы болмады. Германиялық Геннадий Чудиновичтен сегіз ұпай алда тұрып, соңғы секундта «таза әдіске» түсіп қалды. Ал әйелдер арасында 53 килода бозкілемге шыққан Татьяна Ахметова алғашқы айналымда-ақ әлем чемпионатының қола жүлдегері, Польша спортшысы Роксана Марта Засинадан 2:3 есебімен жеңілді.
Қазіргі бессайыс бәсекесінің іріктеу қорытындысы бойынша Елена Потапенко 36 спортшының ішінен 8-ші сатыға тұрақтады. Бүгін бессайысшылар жүзуден, ат спортынан және семсерлесуден бақ сынайды.
Тректегі велоспорттағы «омниум» бойынша жарыс жолына шыққан Артем Захаров төрт түрлі бәсекеде бақ сынады. Нәтижесінде, Захаров 62 ұпай жинап, 14-орын алды. Сондай-ақ спорттық жаяу жүрістен 20 шақырымға сынға түскен Георгий Шейко 1:28:38 уақыт көрсеткішімен 39-орында қалып қойды. Ал ашық суда жүзуден 10 шақырым қашықтық бойынша финалдық бәсекеге қатысқан Виталий Худяков тиісті межені 1:57:53.7 уақытта бағындырып, 21-орыннан көрінді. Бұл күні жеңіл атлетикадан биіктікке секіру бойынша Надежда Дубовицкая мен Кристина Овчинникова да финалдық кезеңге шыға алмады.
Токио Олимпиадасында қазақстандық спортшыларға алтын мен күміс бұйырмай, қоржынға қола түсіп жатыр. Құдды Қазақстан «қола дәуіріне» қадам басып бара жатқан тәрізді.
