2020 жылдан бері мал шаруашылығы саласында тек сиырларды түрлі тәуекелдерден сақтандыру жұмысы атқарылып келген болатын. Енді міне нарыққа қой мен жылқыны толық сақтандыруды қамтамасыз ететін жаңа өнімдер енгізілді. Оған барлық ықтимал тәуекелдер кіреді және салыстырмалы түрде құны да төмен.
Мал аурудан, өрттен, жазатайым оқиғалардан шетінен ұрылар сойып алса, жоғалып кетсе сақтандыру арқылы шығынды өтеп алуға мүмкіндік бар.
Малды қалыпты түрде сақтандыру аясында фермер малын өз шаруашылығының аумағында ғана түрлі тәуекелдерден сақтандыра алады. Сақтандырудың кеңейтілген форматында фермер малын 5 км радиуста орналасқан көрші шаруашылықтардағы аурулардың өршуінен сақтандырады.
Сақтандыруға жататын мал саны кемінде 30 бас болуы керек. Сақтандырылатын мал санына байланысты сақтандыру тарифтерінің әртүрлі деңгейлері белгіленген. Мәселен, жылқы үшін – 2,31 пайыздан 6,46 пайызға дейін, ұсақ мал үшін – 2,38 пайыздан 6,16 пайызға дейін.
– Аталған өнімдер бойынша сақтандыру сыйақыларын субсидиялау түрінде мемлекеттік қолдау жұмыс істейді. Ол ауыл шаруашылығы тауар өндірушілерін ынталандыруға және сақтандыру сыйақысы сомасының 50 пайызын субсидиялау арқылы сақтандыру шартын жартылай арзандатуға бағытталған. Осылайша, сақтандыру шартын жасау кезінде фермер шарт құнының жартысын, ал қалған жартысын оператор – Ауыл шаруашылығын қаржылай қолдау қоры төлейді, – деп нақтылады Ауыл шаруашылығын қаржылай қолдау қорының басқарушы директоры Асқар Қалиев.
Жүйеде Қаржы нарығын реттеу және дамыту жөніндегі агенттіктің лицензиясы бар сақтандыру компаниялары ғана жұмыс істейді.
Тәуекелдерді әлемдік сақтандыру нарығында «А» рейтингісі бар Халықаралық қайта сақтандыру компаниясы қайта сақтандыратын болады. Бұл сақтандыру тәуекелдері туындаған жағдайда кепілдендірілген төлемдерді қамтамасыз етуге мүмкіндік береді.
Шарт жасаудан бастап төлемдерге дейінгі барлық рәсімдер фермердің электронды цифрлы қолтаңбасы арқылы Qoldau.kz платформасында орналасқан Agroinsurance ақпараттық сервисінде жүргізіледі.
Аталған өнімдер ішінара автоматтандырылған. Егер жануар ауырған жағдайда эпизоотиялық қызметтер іс-шараларын жүргізуі керек және олардың нәтижелері жүйеге жүктеледі.
