Фото: instagram.com/zhazirabegaly_tv
Марқұмның денесі табылғаны туралы журналист Жазира Бегалы әлеуметтік желідегі парақшасында хабарлады.
«Әнші Гүлнар Сиқымбаеваның ұлы табылды. Өлім себебі әзірге белгісіз. Жақындары оның 24 наурызда үйден шығып, із-түссіз кеткенін айтқан еді. Жаны жаннатта болсын», деп жазды ол.
Алматы қалалық полиция департаментінің баспасөз қызметі ақпаратты растады. Ведомствоның мәліметінше, ер адамның денесі Бостандық ауданынан табылған, сыртқы зорлық-зомбылық белгілері анықталмаған. Оқиғаның мән-жайы анықталып жатыр.
Еске салайық, Баир Сиқымбаевты Алматыда бір аптадан астам уақыт бойы іздестіру жұмыстары жүргізілген. «Lider.kz» еріктілер қозғалысының мәліметінше, ол биылғы 24 наурыз күні сағат 13:20 шамасында Коперник көшесі, 114 мекенжайындағы үйінен шығып кеткен. Содан бері байланысқа шықпаған.
Баир Сиқымбаевтың бойы шамамен 180-185 см, арық денелі, қысқа қара шашты, қоңыр көзді болған. Жоғалған күні үстінде қара түсті спорттық киім болғаны хабарланған.
Баир Сиқымбаев – 2024 жылғы 5 қазанда өмірден өткен белгілі әнші Гүлнәр Сиқымбаеваның жалғыз ұлы.
