Экология • 09 Тамыз, 2021

Алматының көлдерін аралады

63 рет көрсетілді

Қала қауіпсіздігі үшін Іле Алатауының құзар биіктіктеріндегі мұздан пайда болған көлдерді ара-тұра тексеріп тұ­руға тура келеді. Сел қауіп­сіздігін қамтамасыз ету мақ­сатындағы мұндай тір­лік­терге құзырлы мекемелерден бөлек, қала билігі де мүдделі.

Сонымен таяуда Алматы қаласының әкімі Бақытжан Сағынтаев тікұшақпен қасына «Қазселденқорғау» ММ-нің төр­ағасы К.Көкірекбаев пен қаланың Төтенше жағдайлар департаментінің басшылығы мен мамандарын алып, құ­зар биіктіктерде жатқан көл­­дердің жағдайын барып көрді. Моренді көлдердің, сон­дай-ақ Ақсай, Қарғалы және Үлкен Алматы өзендері бас­сейндерінің жағ­дайына баға берілді. Жалпы, Алматы маңында 45 мұзды көл бар, оның жетеуінде биыл пре­вен­тивті жұмыстар жүріп жатыр.

Себебі, ауа райының өзге­руіне байланысты мұздықтар еріп жатыр. Қауіпті жеті көлдегі судың жалпы көлемі 1 миллион текше метрді құрайды, яғни қауіпсіз деңгейге сәйкес. Сел қаупі кезеңі басталғалы бері 1,6 млн текше метр ағызылды.

Моренді көлдердің жағдайы 9 тұрақты қоныстанған және 10 маусымдық гидробекеттерден бақыланады. Алматы әкімдігінің қолдауымен олар тұрғын модульдермен, тірші­лік­ке қажет жабдықтармен және байланыс құралдарымен қам­тамасыз етілген.

Тікұшақпен тексеру нә­ти­жесінде көлдердегі су­дың қауіпті деңгейге жет­пей­тіні анықталды. Моренді көл­дер мен таулы өзендердегі жағ­дай тұрақты. Қаланың жауап­ты мекемелері шаһар тұр­ғын­дарының сел қауіпсіздігін қам­тамасыз ету мақсатындағы жұ­мыстарын жалғастыра береді.

Осы арада қаланың сел қауіпсіздігін қамтамасыз ету мәселесі жүйелі түрде ше­шіліп жатқанын да айта кету керек. Мәселен, Ақсай мен Үл­кен Алматы өзендерінің бас­сейн­дерінде екі сел бөге­тінің құ­рылысы басталды. Бұл гидро­тех­никалық құры­лыстар 3 мыңға жуық нысан­ды және 40 мың­нан астам қала тұр­ғындарын қорғауды қам­тамасыз етеді.

Сонымен қатар қалалық ТЖД сел қаупін бақылаудың автоматтандырылған жүйесін енгізу жобасын жүзеге асырып жатыр. Бірінші кезеңде Үлкен және Кіші Алматы өзендеріне 10 станса орнатылды. Тағы 21 станса екінші кезеңде қо­йылады. Жүйе таулы өзен­дердегі жағдайға 10 параметрге дейін автоматты түрде мониторинг жүргізеді, оның ішінде су деңгейі, ауа мен су температурасы, топырақтың ылғал­дылығы, жауын-шашын­ның қарқындылығы және селді анықтау да тексеріледі.

Таулардың төбесіне тік­ұшақ­пен жеткен Алматының әкімі таудың қауіпсіздігін, тау ла­шық­тарын, бақылау-құт­қару пункт­терін, Тұйық-Су аль­пинис­тік лагерінде тікұшақ ала­ңын жасау жобаларын тексеріп шықты.

 

АЛМАТЫ

 

Соңғы жаңалықтар

Балықшы

Өнер • Кеше

Ғалым ғибраты

Аймақтар • Кеше

Бюрократизм

Қоғам • Кеше

Бірінші байлық

Руханият • Кеше

Агробанк керек пе?

Экономика • Кеше

Ұқсас жаңалықтар