Аймақтар • 11 Тамыз, 2021

Нұрадағы науқан қызу

Нұра ауданындағы аса ірі шаруашылықтың бірі – «Қайнар» ЖШС мал азығын дайындау жұмыстарын сәтті аяқтады. Қорасы шөпке толған қожалық артылғанын айналасындағы ауыл тұрғындарына бөліп берген. Бұл шаруашылық биыл 2 800 тонна шөп дайындап, былтырғы көрсеткіштен 400 тоннаға асып түскен екен.

Қайрат Әбілда

Қазіргі уақытта аудандағы «Жараспай» шаруашылығында шөп шабу, жинау жұмыстары қызу жүріп жатыр. Бүгінге дейін 330 тонна шөп дайындалған. Шаруашылық басшылары биыл ауыл тұрғындарының жем-шөптен тарылмайтынын айтады. Өйткені агрофирма жыл сайын 13,5 мың гектар алқапта дәнді дақылдар дайындап, оларды төрт бірдей астық қоймасында сақтайды. Техниканың жөндемді болғанына да баса маңыз беріледі: шаруашылықта машина-трактор паркі үнемі жаңартылып отырады.

Жалпы алғанда, биыл Нұра ауданы бойынша 156 мың тонна шөп дайындалған. Ал жоспардағы меже – 200 мың тонна. Ауданда шөп дайындау жұмыстарын 20 тамызға дейін аяқтау жоспарланған.

Шөп шабу науқанына аудандағы «Пржевальское» ЖШС де үлкен дайындықпен келді. Жұмысты ұйымдастыра білудің және дер кезінде қабылданған шаралардың арқасында шаруашылық 900 тонна шөп дайындады. Егіс даласындағы жағдай да жаман емес.

Егіс демекші, биылғы қуаңшылыққа қарамастан, «Қайнар» ЖШС алқаптарындағы егіннің бітімі жаман емес. Шаруашылық директоры Сейітжапар Нығметов мұның минералды тыңайтқыштарды қолдану мен жоғары өнімді тұқымдарды пайдаланудың арқасында мүмкін болғанын айтады. Осы жылы компания алты астық жинайтын комбайн мен сонша жем-шөп жинайтын дестелегіштер, соқалар сатып алды. Аграршылар егін өткен жылдың деңгейінен төмен болмайды деген үміттің үстінде отыр.

Аудандағы егіннің бітік шығуына Григорий Прокоп жетекшілік ететін «Шахтерское» элиталық тұқым өсіру шаруашылығы сүбелі үлес қосып келеді. Қазіргі уақытта кәсіпорынның күшімен 15 мың тоннаға арналған қосымша сақтау сыйымдылықтарының құрылысы жүріп жатыр. Бүгінде шаруашылық иелігінде 12 астық және алты картоп қоймасы жұмыс істеп тұр. Жыл басынан бері шаруашылықты дамытуға салынған қаражаттың жалпы сомасы 2 млрд теңгеден асқан. Бұдан бөлек, аграрлық кәсіпорын техника түрлерін де жыл сайын жаңартып отырады. Мысалы, осыдан бір ай бұрын дәнді дақылдарды уақтылы жинау үшін отандық өндірістегі 8 астық жинайтын комбайн сатып алынды.

Жалпы, Нұра ауданы бойынша егін орағына 15 тамызда түсу, ал жаппай егін жинауға 1 қыркүйектен бастап кірісу жоспарланған.

Қарағанды облысы,

Нұра ауданы