– Чемпионатта мен жарыстың үш түрі бойынша күш сынадым. Классикалық сын тоғыз турдан тұрды. Тоғыз қарсыласымның бәрін де жеңдім. Екінші рапид деп аталатын түр бойынша өткен тоғыз раундтың алтауында жеңіске жетіп, қола жүлде алдым. Ал соңғы – блиц сынында жеті рет жеңіске жеттім, – дейді балғын чемпион.
Осы табыстан соң жас тоғызқұмалақшыға «Қазақстан Республикасының спорт шеберіне үміткер» атағы берілді. Жалпы, Нұрайым Сайдулла спорттың бұл түрімен бес жылдан бері айналысып келеді. Ол оқитын мектепте тоғызқұмалақ ойыны мектеп бағдарламасына енгізілген.
Тоғызқұмалақ үйірмесінің жетекшісі Әкім Сайдулла аталған спорт түрі балалардың ойлау жүйесін дамытып қана қоймай, оларды математикалық есепте де жүйрік болуға баулитынын айтады.
– Жыл сайын бірінші сыныпқа 60 оқушы келеді. Солардың бәріне тоғызқұмалақ ойынын үйретеміз. Мектеп басшылығы мұндай үрдісті ұдайы қолдап отырады. Мектебімізде оқушылар үзіліс кезінің өзінде тоғызқұмалақ ойнап жатады, – дейді ол.
Қарағанды облысы,
Теміртау қаласы
