Мойынқұм ауданындағы Құмөзек ауылының тұрғындары кейінгі буынға үлгі болсын деген ниетпен ішімдіктен бас тартып отыр. Бұдан былай аталған ауылдағы барлық дүкеннің сөрелерінен «арам су» алынып тасталатын болды. Ауыл ақсақалдары арақ-шарапты сырттан әкеліп ішуге де тыйым салу керектігін айтып жатыр. Олар полицейлерді де осы іске белсене араласуға шақырды.
«Алла Тағала арақ ішудің харам екенін қасиетті Құран кітабында ескерткен. Ішімдіксіз ауыл – берекелі ауыл. Арақ-шарап ішілмеген жерде дұға қабыл болады. Енді Құмөзек ауылы көркейеді. Жаңа мешіт салынып жатыр. Арақ-шарап ішпей өскен жастар рухани тұрғыдан кемел болады. Қылмыс та болмайды. Біз қазір арақтан бас тарту арқылы өзімізді де, отбасымызды да сақтап отырмыз. Енді бұл бастама туралы басқа ауылдарға да барып, түсіндіру жұмыстарын жүргізу керек», дейді Мойынқұм ауданының бас имамы Рысбай Еспенбетов. Ал спиртті ішімдік сатудан бас тартқан дүкен иелеріне жұрт алғыс білдіріп жатыр. Тіпті кәсіпкер Ерболат Саурықов сол дүкен иелеріне арақ сатудан түскен пайданы өз қалтасынан-ақ беретінін айтты.
«Ауылда ақсақалдар кеңесінің жұмысы күшейген. Жастар жағы да өте белсенді. Жыл соңына қарай біз арақ ішудің салдарынан болатын төбелес пен қылмыс санының өзгеруі бойынша салыстырмалы статистиканы да жасап бермекпіз», дейді Сыбайлас жемқорлыққа қарсы іс-қимыл агенттігі Жамбыл облысы бойынша департаменті басшысының бірінші орынбасары Равиль Төлебаев.
Жалпы, бүгінде Жамбыл облысында 5 аудандағы 12 ауыл арақ-шарап ішуден де, сатудан да бас тартып отыр. Аталған ауылдардағы 126 дүкен иесі арақ-шарап сататын сертификаттарын өз еркімен өткіземіз деп отыр. Мұндай игі бастама енді өңірдің өзге де аудан, ауылдарында жалғасады деген үміт бар.
Жамбыл облысы
