Кеше Орталық коммуникациялар қызметінде Өңірлік даму министрі Болат Жәмішев Мемлекет басшысының таяудағы «Қазақстан жолы – 2050: бір мақсат, бір мүдде, бір болашақ» атты Қазақстан халқына жолдаған Жолдауына орай брифинг өткізді.
Кеше Орталық коммуникациялар қызметінде Өңірлік даму министрі Болат Жәмішев Мемлекет басшысының таяудағы «Қазақстан жолы – 2050: бір мақсат, бір мүдде, бір болашақ» атты Қазақстан халқына жолдаған Жолдауына орай брифинг өткізді.
Оған министрдің екі орынбасары Қ.Өскенбаев пен С.Жұманғарин де қатысып отырды. Өңірлік даму министрі Жолдаудың маңыздылығын тілге тиек етіп, оның бірқатар бөлімдеріне арнайы тоқталып өтті. «Жолдауда кәсіпкерлікті дамытуға басымдық берілген. Әсіресе, орта және шағын бизнеске қолдау көрсетіп, оның өркен жаюына мүмкіндік жасау шарасы пысықталған. Ол үшін Өңірлік даму министрлігі бірқатар істерді қолға алып, жүзеге асыру жолдары қарастырылып жатыр. Атап айтқанда, Парламентке «Рұқсаттар мен хабарламалар туралы» заң жобасы енгізілді. Ол бойынша 9 кодекс пен 74 заңға өзгерістер мен толықтырулар енгізіледі. Нәтижесінде жағымды бизнес-ахуал орнығады деген үміт бар», деді Б.Жәмішев.
Министрдің сөзіне қарағанда, кәсіпкерлердің еркін жұмыс істеп, шаруасын кеңейтулеріне көптеген тексерулер мен кедергілер бар көрінеді. Ондай келеңсіздіктердің жолын кесу шаралары өзгертілген және толықтырылған заңда қарастырылыпты. Ендігіде барлық рәсімдер мен талаптар Үкімет қаулыларының деңгейінде бекітілетін болады екен. Мұнымен қатар, кәсіпкерлік қызметті мемлекеттік реттеудің 2020 жылға дейінгі тұжырымдамасы да жасалыпты. Енді оны бекіту мақсатында Мемлекет басшысы Жарлығының жобасы әзірленіпті. Осынау заңдар мен тұжырымдамаларды дайындауға аталған министрлікпен қатар, жауапты ведомстволар мен Ұлттық кәсіпкерлер палатасы да атсалысыпты.
– Министрліктің қазіргі атқарып жатқан жұмыстарының бәрі Елбасының аталған Жолдауынан көрініс тауып жатқанына өздеріңіз көз жеткізіп отырсыздар. Мемлекет басшысы 2050 жылға қарай Қазақстан халқының 70 пайызы қалаларда тұратынын айтты. Мәселен, біздің елге географиялық жағынан ұқсас Австралия мен Канадада солай. Бұйыртса, қазіргі қолға алып жатқан жұмыстарымыз жемісті болса, болашақта халықтың 35 пайызы тұрғындары 2 миллионнан асатын қалаларда тұруы тиіс. Елбасы айтқандай, бұл орындалмас арман-қиял емес, әрекет еткен қандай да қоғам қол жеткізе алатын нақты мақсат, деді министр.
Мемлекет басшысының Жолдауында жүктелген тапсырмалар мен ұсыныстардың Өңірлік даму министрлігіне қарастыларын толық саралап, оларды орындау жолдарын баяндаған Б.Жәмішев, журналистердің қойған сұрақтарына да жауап берді.
Нұрбай ЕЛМҰРАТОВ,
«Егемен Қазақстан».
