Коронавирус • 19 Тамыз, 2021

Екпе алу екпінді жүргізілсе...

81 рет көрсетілді

Бой бермей тұрған індетке қарсы бірден-бір тосқауыл вакцина салдыру екенін елдің сезе бастайтын уақыты жетті. Басқа жол әзірге табыла қойған жоқ. Жасыратыны жоқ, қазіргі таңда Қарағанды облысындағы эпидемиялық ахуал өте күрделі жағдайда тұр. Өткен тәуліктің өзінде өңірдегі жаман тұмау жұқтырғандардың саны 1 101 адамға жетті. Міне, осылайша қалыптасқан жағдай жалғыз ғана құтқарушы ретінде екпе алуға жүгінуге тура келетінін тағы бір мәрте еске салады.

Vero cell Қарағандыға жетті

Sinopharm компаниясы шығарған Vero Cell вакцинасының 40 мың дозасы Қарағанды облысына жеткізілді. Екі компоненттен тұратын бұл екпе 20 мың адамды аурудан аман алып қалуға жеткілікті.

Мамандардың айтуынша, қытайлық Vero Cell вакцинасы – инактивті. Оны өндіру барысында вакциналарды жа­сау­­дың стандартты технологиясы қол­­данылған. Яғни ауруды тудыруы мүм­кін вирустың патогендік бөлігі өлті­рі­леді. Бірақ оның денеде қорғаныс анти­де­не­ле­рінің пайда болуына себепкер қа­бі­леті сақ­талып қалады.

Бұл вакцинаны бірінші кезекте қауіп тобындағы науқастарға салу көзделген. Жасы 18-ден асқан адамдарға арналған. Ерек­ше атап өтетін бір жайт, Vero Cell вакцинасын Дүниежүзілік денсаулық сақтау ұйымы мақұлдаған.

Қарағанды облыстық Денсаулық сақтау басқармасының баспасөз қыз­меті таратқан мәліметке сай, Vero Cell препа­ра­тының бір дозасы 0,5 мл-ден тұрады. Вакцинаның әрқайсысы 0,5 мл болатын екі дозасын үш-төрт апта аралығында салу ұсынылады. Аралық нәти­желер COVID-19-ға қарсы 79,3% тиім­ділікті және орташа және ауыр жағ­дай­лардың алдын алуда 100% тиім­ділікті көр­сетеді.

 

Ауруханаларға ауа жеткізеді

Қарағанды құю-машина жасау зауыты өндіріске қажетті құрамы 99,7% бо­латын таза оттегі өндіріп келген. Енді кә­сіпорын Қарағанды облысының Ден­сау­лық сақтау басқармасының өтіні­ші бойынша коронавирус инфекциясынан зардап шеккен адамдарға көмек қолын созбақ. Дәлірек айтқанда, Maker ЖШС «қоңыр-қызыл аймақтан» шыға алмай отырған Қарағанды облысының ауруханаларына арнап оттегі өндіретін болды.

Оттегі-компрессор учаскесінің бас­тығы Досхан Түсіпов зауыттың әлеу­мет­тік жауапкершілікті жақсы сезі­нетін кәсіпорын болғандықтан, адам­дардың өмірі мен денсаулығына қатысты ден­сау­лық сақтау басқар­ма­сының өтіні­шін жерге тастамағандарын айтады.

– Осы аптада біз алты текшелік 148 баллонды оттегіге толтырдық. Жұмыс­ты күні-түні істедік. Бізге аурухана кө­лік­тері таңғы сағат 4.00-де және 5.00-де ке­ліп жатты. Мойнымызға алған мін­де­ті­мізді барынша жауапкершілікпен ат­қа­руға тырыстық, – дейді ол.

Maker ЖШС басқарма төрағасы Жәнібек Байғабылов өздерінің адам­дар­дың өмірін сақтап қалуға сүбелі үлес қосып жүргендерін мақтанышпен атап өтіп, мұндай миссия біздің зауыттың жұмысшыларына рухани күш беретінін айтты.

 

Вакцина алғаның – олжалы болғаның

Академик Е.Бөкетов атындағы Қара­ған­ды университеті вакцина сал­дыр­ған профессор-оқытушылар құ­рамы мен студенттер арасында ұтыс ойынын ұйым­дастырды. Іс-шараға қатысушылар өзде­­рінің вакциналау төлқұжаттарын көр­сетіп, автоматты түрде ұтысқа қаты­су­шылардың тізіміне тіркелді.

Шілде айының 1-інен басталған бұл ұтыс ойынының нәтижесінде 20 адам шипажай және демалыс орнына жолдама ұтып алды. Алдағы уақытта олар «Мойылды», «Сарыағаш» шипажайларына және «Балқаш» демалыс үйіне барады.

Мұндай ұтыс ойыны бір ғана мақ­сат­ты көздейді, бұл – университеттегі профессор-оқытушылар құрамы мен сту­денттерді вакцина алуға ынталандыру.

Университеттің баспасөз қызметі білім ордасындағы оқытушылар мен қыз­­мет­керлердің студенттер мен олар­дың ата-аналары алдындағы жауап­кер­­шілікті сезе және екпе алудың пан­де­мияға тосқауыл болатынын түсі­не отырып, вакциналауды қарқын­ды түрде жалғастыратынын хабарлады. «Вау­черлердің ұтыс ойыны – қа­ты­су­шылардың барлығы үшін жағым­ды бонус. Алдағы уақытта біз жолда­ма­­­лар­ды ғана емес, басқа да бағалы сый­лықтарды ойнатуды жоспарлап отыр­мыз», делінген университеттің баспасөз қыз­меті таратқан хабарламада.

 

Қарағанды облысы

 

Соңғы жаңалықтар

Цифрландыру – өзекті мәселе

Үкімет • Бүгін, 00:49

БҰҰ-ның Жаһандық шартына қосылды

Экономика • Бүгін, 00:34

Жеті түрлі сөз

Әдебиет • Кеше

Антына адал азамат

Қазақстан • Кеше

Елорда күніне тарту

Театр • Кеше

Ұқсас жаңалықтар