Кездесуге ҚР АҚДМ аппаратының басшысы Айжан Шайназарова, «Adaldyq alany» жобалық кеңсесінің басшысы Тимур Жұмырбаев, Жастар және отбасы істері комитетінің төрағасы Шахмардан Байманов, «Азаматтық бастамаларды қолдау орталығы» КЕАҚ Басқарма Төрайымы Лима Диас және «Даму» Қазақстандық қауымдастығы» ЗТБ өкілдері қатысты.
Ведомство баспасөз қызметінің жазуынша, бұл ынтымақтастық сыбайлас жемқорлыққа мүлдем төзбеу мәдениетін бірлесе отырып дамытуды көздейді. Оның аясында жастар мен студенттер ұйымдарына білім беру тренингтері өткізіледі, сыбайлас жемқорлыққа қарсы іс-қимыл тақырыбында әлеуметтік бейнероликтер жасалады, сондай-ақ шығармашыл жастарды қолдау мақсатында эссе мен сурет конкурсы жарияланады. Аталған бастамалар жастар арасында сыбайлас жемқорлыққа қарсы мәдениет қалыптастыруға бағытталған.
«Бүгінде дәл осы жастар қоғамдағы үрдістерді жиі қалыптастырады. Біз үшін қазіргі жастардың сыбайлас жемқорлыққа «мүлдем төзбеушілік» қағидатын ұстануы маңызды. Бұл студенттер үшін де, жұмысшы жастар үшін де өзекті», деп атап өтті «Adaldyq alany» жобалық кеңсесінің жетекшісі Т.Жұмырбаев.
Құжатқа «Азаматтық бастамаларды қолдау орталығы» КЕАҚ қолдауымен іске асырылатын «Жастардың сыбайлас жемқорлыққа қарсы мәдениетін қалыптастыру бойынша іс-шаралар кешенін өткізу» жобасы шеңберінде қол қойылды.
