Алматы қаласы әкімдігінің ұйымдастыруымен Қазақстанның халық жазушысы, атақты ақын Қадыр Мырза-Әлінің құрметіне бұрын өзі тұрған үйде ескерткіш тақта ашылды.
Алматы қаласы әкімдігінің ұйымдастыруымен Қазақстанның халық жазушысы, атақты ақын Қадыр Мырза-Әлінің құрметіне бұрын өзі тұрған үйде ескерткіш тақта ашылды.
Жетпістен аса поэзиялық, прозалық, сондай-ақ, әдеби сын жанрларында жазылған бірнеше кітаптың авторы, екі жүзге тарта өлеңіне ән жазылған арқалы ақынды ұлықтау шарасына Алматы қаласының әкімі Ахметжан Есімов, ақынның туған жері Орал өңірінен арнайы келген азаматтар және қазақ әдебиеті мен өнерінің өкілдері қатысты.
– Бүгінгі қазақ поэзиясын Қадыр ақынсыз елестету мүмкін емес. Қазақтың бірнеше буыны оның өткір де, асқақ жырымен сусындап өсті. Өткен мен бүгіннің, тіпті, келешек қоғамның бүлкілдеген тамырын дөп басатын өрелі ақын қазақтай халық бар кезде ешқашан ұмытылмақ емес, – деді қала әкімі А.Есімов салтанатты шарада сөйлеген сөзінде.
Иә, «Өзге тілдің бәрін біл, өз тіліңді құрметте», деп жырлап өткен Қадыр ақын егемендікке қол артқан тұста Алматы қаласында алғашқы қазақ мектептерін ашуға ұйытқы болған еді. Және оның бұл азаматтық еңбегі әр қазақтың жүрегінде әрдайым сақталатыны да рас.
Бүгінде Қадыр Мырза-Әлінің пьесалары республикамыздың барлық дерлік театрларында сахналанып жүр. Оның ешкімге ұқсамайтын озық ойлы туындылары әлемнің бірнеше тілдеріне тәржімаланып, ол аударған әлемдік классиктердің еңбектері өз оқырмандарын бекзаттыққа баулып келеді.
1980 жылы ақынға «Жерұйық» атты жыр кітабы үшін Қазақ КСР Мемлекеттік сыйлығы, 1993 жылы рухы биік әдеби туындылары үшін Моңғолияның халықаралық «АВЬЯС» сыйлығы берілді. 2001 жылы тәуелсіз «Тарлан» сыйлығымен және әр жылдарда «Парасат», І дәрежелі «Достық» ордендерімен наградталды.
Салтанатты шара барысында ақынның замандастары, жары мен қоғам қайраткерлері естеліктер айтып, келешекте Алматы қаласынан Қадыр Мырза-Әлінің атына көше беру туралы ұсыныстарын ортаға салды.
Қанат ЕСКЕНДІР,
«Егемен Қазақстан».
АЛМАТЫ.
–––––––––––––––––––––––––––––––
Суретті түсірген Берсінбек СӘРСЕНОВ.
