Суоми еліндегі сайыс

Суоми елінде Серік Керім­бек­ұлы керемет өнер көрсетті. Бас­тапқы бәсекесінде ирландиялық Джозеф Фенлонды сабаған ол ширек финалда Еуропа бірін­ші­лігінің күміс және Жерорта теңі­зі ойындарының қола жүлде­гері, югославиялық Сретен Мир­ковичтен басым түсті. Жартылай финалда Мажарстанның мық­тысы Тибор Молнарды жеңген қазақ жігіті шешуші сайыста Олим­пия ойындары мен әлем чемпионатының қола жүлдегері, ГФР-дың өкілі Карл-Хайнц Крюгермен күш сынасты. Неміс боксшысын Қонақбаев жақсы біледі. 1979 жылы Кельнде өткен Еуропа біріншілігінде де екеуі­нің жолы қиысқан еді. Сол жек­пе-жекте қарсыласын үш мәрте нокдаунға жіберген Серіктің пайдасына шешілді. Бұл жолы да қандасымыздың мықтылығы еш күмән туғызған жоқ. Германияның дүлдүлін 5:0 есебімен ұтқан Серік Қонақбаев қатарынан екінші рет Еуропа чемпионы атанды. Және де сол жылдың қорытындысы бо­йынша даңқты Жамбыл бокс мек­тебінің түлегі әлемнің ең үздік былғары қолғап шебері деп танылды.

Қонақбаевтың спорттық ғұмы­рында жарқын жеңістер аз болған жоқ. Ол Еуропа біріншіліктеріндегі табыстарынан бөлек, Әлем кубогын екі рет олжалады. Әлем чемпионатының финалында күш сынасты. 1980 жылы Мәскеуде алауы тұтанған Олимпия ойындарында күміс медальды мойнына ілді. Финалда ол италиялық Патрицио Оливадан ұтылды. Негі­зі ғаламдық додада бас жүлде біздің жігітке бұйыруға тиіс еді. Бірақ бұл бәсекенің тағдыры саяси тұрғыдан шешілгенін көзі қарақты көрермен жақсы біледі. Себебі Италияның спорт басшылары өз өрендеріне Кеңес Одағында өткен Олимпиадаға қатысуға рұқсат бермеді. Басшылардың сөзіне құлақ аспаған Патрицио ешбір кедергілерге қарамастан төрт жылда бір өтетін байрақты бәсекеде бақ сынауға бел буды. Тәуекел деді де, өз қаражатымен Мәскеуге келді. Міне, осы жайттың барлығын ескерген жарыс қожайындары әлемдік қоғамдастық алдында ұпай жинау мақсатымен капиталистік елден келген спортшының жеңіске жетуіне қолайлы жағдайдың барлығын жасады.

Тампередегі Еуропа чемпио­на­тында жамбылдық Серік Қонақ­баевтан бөлек, КСРО құрамасы сапындағы боксшылар арасында магадандық Виктор Рыбаков (60 кило), куйбышевтік Василий Шишов (63,5 кило), мәскеулік Александр Кошкин (71 кило), эстониялық Юрий Торбек (75 кило), костромалық Александр Крупин (81 кило) және украиналық Виктор Мирошниченко (54 кило) мен Александр Ягубкин (91 кило) топ жарды. Ал қалған салмақ дәрежелерінің бас жүлдесі болгариялық Ивайло Маринов (48 кило) пен Петр Лесовқа (51 кило) және германиялық Рихард Новаковски (57 кило) мен ита­лия­лық Франческо Дамианиге (+91 кило) бұйырды.

Суоми еліндегі сол жарыста қа­зақтың тағы бір мықты боксшысы бақ сынады. Ол – Серік Нұрқазов. Қарағанды бокс мектебінің түлегі қола медальды иеленді. 57 кило салмақта сынға түскен қан­да­сы­мыз югославиялық Деян Марович  пен ирландиялық Дамиен Фиерс­тен басым түскенімен, жарты­лай финалда ГДР-дың өкілі Рихард Новаковскиге есе жіберді. Шынтуайтына келгенде, Нұрқа­зов даңқты қарсыласынан еш қай­мықпай, тең дәрежеде айқасқа­нына Тампередегі зәулім спорт ке­шеніне жиналған дүйім жұрт куә. Бұл жекпе-жекте таразы ба­сы ұзақ уақыт теңселіп тұрды. Бәсеке аяқталғаннан соң төреші­лер біраз ойлана-толғана келе, Мон­реаль Олимпиадасының күміс, Мәскеу Олимпиадасы мен әлем чемпионатының қола жүлде­гері, Еуропа чемпионы деген дар­дай атақтары бар неміс боксшы­сының қолын көтерді. Есеп – 3:2. Осылайша, Рихард финалға шықса, біздің Серік қола медальды қанағат тұтты.