Президент • 03 Қыркүйек, 2021

Стратегиялық міндеттерге назар аударылды

Президенттің биылғы Жолдауы өте маңызды экономикалық блокпен ерекшеленді, елдің экономикалық кешені жұмысының негізгі мәселелерін, сондай-ақ қазіргі жағдайдағы кейбір өзекті түйткілдерді қамтитын кешенді сипатқа ие.

Egemen Qazaqstan

Жолдауда айтылған экономикалық дамудың маңызды аспектілерінің бірі ретінде жалғасып жатқан COVID-19 пандемиясының қиын жағдайында халық пен бизнесті қолдау шараларын кеңейту қажеттілігін айтуға болады.Олар 2022 жылға дейін ұзартылып,
1 трлн теңге сомасында өте ауқымды қаржыландыруды қарастыратын «Қарапайым заттардың экономикасы» мен «Бизнестің жол картасы» бағдарламалар негізінде жүзеге асады. Бірнеше жылға созылған және өткен жылы олардың масштабын ұлғайту арқылы экономикаға жақсы қолдау болған бұл бағдарламалар алдағы уақытта да мемлекеттің көмегімен экономиканың негізгі секторларында жұмыспен қамту және өндірісті одан әрі қолдауға негіз болады.

Президенттің мемлекеттік қаржыны басқарудың тұжырымдамасын дайындау туралы тапсырмасы ерекше маңызды және уақтылы. Соңғы жылдардағы дағдарыс құбылыстарымен күрес барысында, атап айтқанда, 2020 жылдың аяғында, жаһандық дағдарыс пен пандемиямен күрделендірілген кезде, мемлекеттік қаржы саласында дағдарысқа қарсы күрес шараларының ауқымды шығындарынан туындаған күрделі проблемалар байқалды. Ұлттық қордың шығыстары өте ауқымды, одан соңғы жылдары республикалық бюджетке 3-4 триллион теңге қаржы аударылды, бюджет тапшылығы мен онымен байланысты қарыздар күрт өсті, бұл мемлекеттік қарыз көлемі мен оның ІЖӨ-ге қатынасының айтарлықтай өсуіне әкелді. Бұл проблемаларды жай қалдыруға болмайды, олар шұғыл шешімді талап етеді, сондықтан мемлекеттік қаржыны басқару тұжырымдамасын әзірлеу өте маңызды.

Сондай-ақ Президент экономикалық даму саласындағы бірқатар стра-
тегиялық міндеттерге де назар аударды. Ағымдағы проблемалар, тіпті ең өзекті проблемалар (Жолдауда айтылған инфляцияның өсуі немесе жекешелендіру сияқты) күн тәртібіндегі ұзақ мерзімді негізгі міндеттерді алмастырмауы тиіс. Мемлекет басшысы нақты тапсырмалар берген мұндай міндеттерге кешенді шаралар арқылы көлік-энергетикалық инфрақұрылымды дамытуды жалғастыру, жаңа бірыңғай тұрғын үй бағдарламасын әзірлеу, халықтың өмір сүру деңгейі мен табысының жиынтығы арқылы арттыру, Қазақстанның цифрлық саладағы әлеуетін іске асыру кіреді.

Осылайша, Жолдаудың экономикалық блогы теңдестірілген сипатта, ол күрделі сыртқы жағдайлармен қалыптасатын ағымдағы міндеттерге де жауап береді және елдің ұзақ мерзімді дамуының негізгі векторларын, сондай-ақ оларды іске асыру бағыттары мен әдістерін анықтайды.

Вячеслав ДОДОНОВ,

Президент жанындағы ҚСЗИ
бас ғылыми қызметкері, экономика ғылымдарының докторы

Күннің маңызды және өзекті жаңалықтарын «Егемен Қазақстан» телеграм каналынан оқыңыз