«Сыпатай батыр авто» шекаралық бақылау жасағының «Мерке» жеке бақылау пунктінің шекара наряды Жамбыл облысы бойынша кедендік бақылау департаментінің қызметкерлерімен бірлесіп, еліміз аумағынан 2 килодан астам героин алып өтпекші болған Қырғызстан азаматын ұстады. Бұл туралы Ұлттық қауіпсіздік комитеті Шекара қызметінің баспасөз қызметі хабарлады.
Ол паспорттық бақылаудан өту кезінде 4 бумаға мұқият оралған 2 кило, 300 грамм героинді алып келе жатқаны анықталды.
***
Сондай-ақ өткен апта соңында «Қордай» шекара заставасында орналасқан еліміз шекарашылары 2 тонна құс етін заңсыз алып өтпекші болған 3 адамды қолға түсірді. Олардың алып келе жатқан құс еті Қырғызстаннан тиелгені мәлім болды. Қазір осы ұсталған азаматтарға қатысты тергеу амалдары жүргізілуде. Әбдірахман Қыдырбек. Дереккөз: ҰҚК ШҚ баспасөз қызметі Фото: Interfax.by
