DELOS америкалық халықаралық дыбыс жазу компаниясы әлемде 40 жылдан астам уақыт бойы жұмыс істеп келеді. Оның жазбалары бірнеше рет Грэмми сыйлығына ұсынылған. Сонымен бірге айтулы жобаға литвалық солистер де қатысты. Жазбаға бастамашылық танытқан Нью-Йорк қалалық операсының жаңадан тағайындалған музыкалық жетекшісі, әйгілі дирижер Константин Орбелян.
− Ел тарихында алғаш рет В.Беллинидің «Пуритандар» операсына қатысып, бірегей аудиодискіні жазу – мен үшін үлкен тәжірибе болды. Танымал коуч, дирижер Джон Фишермен жұмыс істеу үшін бір апта ерте келдім. Жазу барысы асқан дәлдікпен жүргізілді, ол төрт бөлімнен тұрды. Туындыны жазу, шамамен екі аптаға созылса да, бәрі де көңілімнен шықты. Әлемде Беллинидің «Пуритандар» операсы жазбасының бірлі-жарым нұсқалары бар. Бұл шығарма – опера өнерінің шыңы, бельканто жауһары, сондықтан әншінің шеберлігі мықты болуы керек, себебі бельканто – вокалдық техниканы меңгерудің ең биік көрсеткіші, − деп атап өтті Азамат Жылтыркөзов.
Шынын айтқанда, бұл әлемдік музыка үшін ғана емес, отандық опера өнері үшін де айтулы оқиға. Эксклюзивті дискінің мұқабасында дарынды жерлесіміздің есімі жазылады. Енді Азамат Жылтыркөзов халықаралық тәжірибесін өз елімізде пайдаланып, шетелдік әріптестерімен бірлесіп, қазақстандық орындаушылармен, дирижерлермен ұлттық опера репертуарын жазуға ниеттеніп отыр.
