Құтқарушылар күш сынасты. Қарағандыда өрт сөндіру-құтқару спортынан әлем чемпионаты өтті

Дүниежүзілік доданың ашы­лу салтанатында құтқарушы спорт­шылар Жамбыл облы­сын­да жа­рылыс салдарынан қаза тап­қандарды бір минут үн­сіздікпен еске алды. Іс-ша­раға қатысқан мәртебелі мей­мандардың қата­рында Халық­аралық өрт сөн­дірушілер мен құтқарушылар спорт феде­ра­циясының президенті, Бе­ла­русь Республикасының Тө­тен­ше жағдайлар министрі Ва­дим Синявский, Ресей Феде­ра­­ция­сының Азаматтық қор­ға­ныс, төтенше жағдайлар және та­биғи апаттардың салдарын жою министрінің бірінші орынбасары Александр Чуприян болды.

Жалпы, Өрт сөндірушілер мен құтқарушылардың халықара­лық спорт федерациясы және Қа­зақстан Республикасының Төтен­ше жағдайлар министрлігі ұйым­дастырған жарыстың пан­демияға байланысты санитарлық-карантиндік талаптарды сақтай отырып, көрерменсіз өткенін айта кеткен ләзім.

Әлем чемпионатына дүние жүзі­нің он елінен, атап айтқанда, Ресей, Беларусь, Словакия, Поль­ша, Сенегал, Чехия, Өзбекстан, Моң­ғолия, Аустрия және Қазақ­стан­нан 10 ерлер және 5 әйелдер коман­дасы қатысып, жүлделерді сарапқа салды.

Айта кету керек, Қарағанды дәл осындай деңгейдегі жарыс­ты өткізген Қазақстанның екінші қаласы. Еліміздің Төтенше жағ­дайлар министрі Юрий Ильин кеншілер астанасының кездей­­соқ таңдалмағанын айтады. Оның пікірінше, қолайлы логистика­ға және стандарттарға сәйкес ста­дионның болуы таңдаудың дәл осы қалаға түсуіне тікелей әсер етіпті. Өйткені чемпионатты ашық аспан астында өткізу қажет болған екен.

Жарысты ұйымдастырушы­лар стадионда қажетті база да­йындап, доданың жоғары дең­гей­де өтуіне барынша жағдай жа­са­ған. Қатысушыларға ыңғайлы болу үшін киім шешетін шатырлар, фудкорт орнатылды. Қазақ халқының ұлттық салт-дәстүрімен танысу мақсатында арнайы этно-ауыл құрылғанын айта кету керек. Бұдан бөлек, чем­пионаттың ашылуы аясында апаттық-құтқару техникасы мен жабдықтарының көрмесі өтіп, онда отандық өнімдер де келушілер назарына кеңінен ұсы­нылды.

Әлем чемпионатының додасы оқу мұнарасының төртінші қабатының терезесіне шабуыл сатысымен көтерілу, 100 метр­лік кедергілер жолағынан өту, жауынгерлік қанат жаю және 100 метрден төрт өрт эстафетасы сыны бойынша өтті.

Жарыс қорытындысында Бе­ла­русь құрамасы жалпы­коман­далық есепте әйелдер және ерлер арасында әлем чемпионы атанды. Екінші жүлде Ресей командасына бұйырса, қола жүлдені Чехия құрамасы қанағат тұтты. Ал Қа­зақстанның ерлер командасы жауынгерлік қанат жаю жарысында чемпион атанды.

Турнирдің жеңімпаздары мен жүлдегерлері арнайы кубок­тардан бөлек медальдармен, дипломдармен және бағалы сый­лықтармен марапатталды. Келесі әлем чем­пионаты Өз­бек­стан­ның Самарқанд қа­ла­­сын­да өтетін болды. Осы­ған орай, жарыстың жабылуын­да Қазақ­стан құрамасы Өз­бек­стан­дағы әріп­тестеріне Өрт сөн­діру­шілер мен құт­қару­шы­лар­дың ха­лықаралық спорт феде­рациясының туын табыс етті.

ҚАРАҒАНДЫ