Алматыда кейінгі бес жылдың ішінде 25 балабақша салынып, самаладай сәнді ғимараттар сәбилердің күлкісіне толды. Тек соңғы күндері оңтүстік астанада төрт бірдей балабақшаның тұсауы кесіліп, кезекте тұрған қала тұрғындары бүлдіршіндерін жаңа ортаға жетектеп апаратын кез келді.
Алматыда кейінгі бес жылдың ішінде 25 балабақша салынып, самаладай сәнді ғимараттар сәбилердің күлкісіне толды. Тек соңғы күндері оңтүстік астанада төрт бірдей балабақшаның тұсауы кесіліп, кезекте тұрған қала тұрғындары бүлдіршіндерін жаңа ортаға жетектеп апаратын кез келді.
Сондай заманауи жаңа балабақшаның бірі – тұрғындары тығыз орналасқан Айнабұлақ шағын ауданындағы № 179 балабақша. Айнабұлақ жақтағы мектеп жасына дейінгі жаңа мекеменің ашылу салтанатына қала әкімі Ахметжан Есімов қатысып, елеулі оқиғамен балдырғандарды, олардың ата-аналарын құттықтады, «Балапан» бағдарламасының маңыздылығын атап өтті.
– Алдымызда тұрған маңызды міндеттердің бірі – болашақ жас ұрпақты тәрбиелеу. Бұл үшін Алматыда барлық жағдайлар жасалуда – балабақшалары мен мектептер салынуда. Біз бала тәрбиесінің ең алдымен балабақшадан басталатындығын ескеруіміз керек, – деді шаһар басшысы.
Әкім қалада 424 мектеп жасына дейінгі балалар мекемесі бар екендігін жеткізді. Бұларда 51 500 бала тәрбиеленуде. Жоғарыда атап өткендей, тек соңғы бес жылдың ішінде ғана мегаполисте 4090 орынды 25 балабақша салынды. Осы жылдар ішінде 1740 орындық 7 ғимарат қала меншігіне қайтарылды. Нәтижесінде Алматыда балабақша саны 8,1 пайызға (5 830 орындық) өсті.
Ал Айнабұлақ ықшам ауданындағы №179 балабақшаға 120 бүлдіршін бара алады. Ол қазіргі заманғы жабдықтармен толық қамтылған. Оқу-тәрбие жұмыстары мемлекеттік тілде жүзеге асуда.
Таяу арада мегаполистегі «Саялы», «Алғабас», «Ақбұлақ» ықшам аудандары мен Шаляпин мен Ы.Алтынсарин көшелерінің қиылысында жаңа балабақшалар бой көтеретін болады.
Айнаш ЕСАЛИ,
«Егемен Қазақстан».
АЛМАТЫ.
