Елбасы Нұрсұлтан Назарбаев биылғы Жолдауында да аналарға үлкен жауапкершілік жүктеп отыр. Ол кісінің «Мәңгілік Қазақстан» жобасының іргетасын біздің балаларымыз қалап, немерелеріміз игілігін көретін болады. Сондықтан да «Бұл Стратегия сіздерге арналған. Оны жүзеге асыратын да, жемісін көретін де сіздер. Өз жұмыс орындарыңызда отырып, осы жұмысқа әрқайсыңыз атсалысыңыздар. Елдің болашағын барша халықпен бірге жасаңыздар!» деп отыр Елбасы.
ОТАН ОТБАСЫ ЖАУАПКЕРШІЛІГІНЕ ИЕК АРТАДЫ
Елбасы Нұрсұлтан Назарбаев биылғы Жолдауында да аналарға үлкен жауапкершілік жүктеп отыр. Ол кісінің «Мәңгілік Қазақстан» жобасының іргетасын біздің балаларымыз қалап, немерелеріміз игілігін көретін болады. Сондықтан да «Бұл Стратегия сіздерге арналған. Оны жүзеге асыратын да, жемісін көретін де сіздер. Өз жұмыс орындарыңызда отырып, осы жұмысқа әрқайсыңыз атсалысыңыздар. Елдің болашағын барша халықпен бірге жасаңыздар!» деп отыр Елбасы.
Мен қала қызымын, ауыл келінімін. Сегіз баланы дүниеге әкелсем де жұмыстан қалған емеспін. Үйде де қарап отырмаймыз. Құрақ құрап, киіз басуды, шаруа істеуді қайын енемнен үйрендім. Балаларыма да үйретудемін. Бұл – тәрбиенің тәлімді өрнегі. Қазір үй жанынан тігін цехын ашып, ұлтымыздың қолөнерін дамыту қамындамын. Жолдауда атап көрсетілгеніндей, бұл іске отбасы мүшелерін кеңінен тартатын боламын.
Келешегі кемел елдің болашағы – тәрбиелі ұрпақта. Бұл орайда, баланы материалдық қамтамасыз етуден гөрі, оның тәрбиесімен айналысу қиынырақ. Бала әуелі ата-анасының сөзі заң болғандықтан, әке-шешесінің жасаған іс-әрекетін өзіне үлгі етіп алады. Исламда «бала Жаратқан иеміздің ата-анаға жіберген аманаты» деген түсінік бар. Осы жолда сенім биігінен көрініп, міндетін адал атқарған ата-аналар қандай сый-құрметке болсын лайықты.
Отбасы – Отанның бір бөлшегі деген жақсы сөз бар. Ендеше, ертеңгі ерен істеріміз, телегей табыстарымыз, бақытты тіршілігіміз баршамыздың қолымызда екендігін ұмытпайық дегім келеді.
Роза АСЫЛБЕКОВА,
«Алтын алқа» иегері.
Ақмола облысы,
Целиноград ауданы.
ӘН МЕН КҮЙ ӘЛЕУМЕТ ТОҚ БОЛҒАНДА ҒАНА КЕРЕК
Ел өмірі тек мәдениеттен тұрмайды. Ең алдымен, халықтың тұрмысы жақсы болуы керек екенін әрқайсымыз білеміз. Нан болса ән де болатынын бала кезімізден құлағымызға құйып өскен ұрпақпыз. «Ораза, намаз тоқтықта» дегендей, Елбасының биылғы Жолдауында ең бірінші әлеуметтік мәселелердің көтерілгені өнер адамдарының да көңілінен шығады деп ойлаймын. Экономикасы мен ғылым-білімі дамыған ел ғана мәдениетке көңіл бөле алатынына көзіміз жеткен.
Сондықтан да Жолдауда басымдық берілген барлық салалардың дамуы түптің-түбінде ұлттық өнерге де жағдай жасауға жол бастап береді деп есептеймін. Тыныштығы, татулығы, дамуы жоқ елдердің мәдениет түгілі, бас қайғысымен, бір күнкөріс қамы үшін өзге елдерден жұмыс іздеп, сенделіп жүр. Сондықтан да Президентіміздің бүгінгі табысымызға тоқмейілсімей, ертеңгі болашағымызға көп мән беріп, жастарымыз бәсекеге қабілетті елдермен терезесі тең дәрежеде білім алуына ықпал жасап отырғанына біз де қуанамыз.
Өз ата-анам еңбекпен көркейген қарапайым адамдар болғандықтан, алдымен әртүрлі салаларда жұмыс істеп жатқан жандардың жалақысы көтеріліп, жағдай жасалып жатқаны баршамыз үшін маңызды. Әрқайсымыздың әке-шешеміз мұғалім, енді біреулеріміздің ата-анамыз малшы, дәрігер, бауырларымыз студент болғандықтан, Елбасы Жолдауында айтылған, жеке-жеке тоқталған мәселелердің бәрі айналып келгенде баршамызға қатысты болып шығады.
Елбасымыз басқасын былай қойғанда, айран-сүтті алыстан тасымай, өзіміз өндіріп, қайта шет мемлекеттерге экспорттауды да айтып отыр. Мысалы, алғашқы медициналық-санитарлық көмекті дамыту, спортпен шұғылдану, дұрыс тамақтана білу, жүйелі профилактикалық тексерілу дегендердің барлығы біздің халқымыз үшін ауадай қажет. Сонан соң маған мүмкіндігі шектеулі, мүгедек жандарды да жұмыспен қамтып, олардың қоғамдық көліктерде қозғалуына, баратын жерлеріне барып-келуіне жағдай туғызу керек деген жолдар өте ұнады. Шетелдерде гастрольдік сапарларда болғанда, ол елдерде мүгедек жандарға жасалған жағдайларды көріп, бізде де осындай болса екен деп ойлайтынмын. Бұл – өз халқын сыйлаған, сүйген Елбасымыздың үлкен ісі. Қоғамдағы әрбір адамның жағдайын ойласақ, ертең осының бәрі алдымыздан шығады.
Елбасы, өте күрделі, жан-жақты тапсырмалар бере отырып, мәдениет саласынан бәрібір аттап өткен жоқ. Нұрсұлтан Әбішұлы: «Жалпықазақстандық мәдениетті дамытуға жаңаша серпін берген жөн. Мәдени саясаттың ұзақмерзімді тұжырымдамасын әзірлеу қажет. Онда қазақстандықтардың бәсекеге қабілетті мәдени ментальдігін қалыптастыруға, заманауи мәдениет кластерлерін дамытуға бағытталған шаралар белгілеу керек», деді.
Кезінде өнер саласы да талай қиындықтар мен қаржы тапшылығын бастан өткерді. Енді жаңа заманға аяқ бастық. Алдағы уақытта өнер саласын сапаландыру ісі жүретініне сенемін.
Мәдина СӘДУАҚАСОВА,
Қазақстанның еңбек
сіңірген қайраткері, әнші.
АЛМАТЫ.
