Спорт • 13 Қыркүйек, 2021

Талдықорғанда триатлоннан Қазақстан чемпионаты өтіп жатыр

184 рет
көрсетілді
3 мин
оқу үшін

Қапшағайда триатлоннан Қазақстан чемпионаты жалғасып жатыр, деп хабарлайды Egemen.kz.

Талдықорғанда триатлоннан Қазақстан чемпионаты өтіп жатыр

Қазақстан триатлон федерациясының мәліметінше, жарысқа Нұр-Сұлтан, Алматы, Шымкент, Ақмола, Қостанай және Түркістан облыстарынан келген түрлі санаттардағы 95 спортшы қатысты. Спортшылар 300 м жүзу, 8 км велодода мен 2 км жүгіру бойынша өзара мықтыны анықтады.

Алматылық Ануар Турубаев қарсыластар алдында мықтылығын тағы да дәлелдеді. Ол Elite санатында 24:31 нәтижесімен топ жарды.  Одан екі минуттай жеңілген Семен Пивоваров (Қостанай обл.) екінші орыннан көрінді. Бұл санаттағы қыздар арасында сайыс алаңына тек Дарья Бычкова шығып, 29:43 нәтижесімен сайысты тәмамдады.

«Андер» санаттарындағы спортшылар арасында бәсекелі сайыс өтті. U15 санатындағы қыздар арасында өзінің тыңғылықты дайындығын 28:06 уақытымен Диана Ержанова көрсетті. Астаналық триатлон федерациясының шәкірті Диананың осы жылы барша республикалық додаларда жеңіске жеткендігін айта өткен жөн. Екінші және үшінші орындарды Ақмола облысының спортшы қыздары Юлиана Петрова (29:46) мен Анель Исабаева (30:02) жеңіп алды.

Бұл санаттағы ерлер арасында 26:07 уақытын көрсеткен астаналық Алинаби Маралбеков алтын алды. Күміс жүлдені ақмолалық Тимур Бакиров (26:39) жеңіп алса, қола жүлде тағы бір астаналық Қуаныш Бекеновтің (26:41) қанжығасында кетті.

U17 санатындағы қыздар арасында тағы бір астаналық спортшы Ева Пинчук (30:21) жеңіске жетті. Екінші орында отыз секундқа қалып қойған Анастасия Захарова (Ақмола обл.) болса, үшінші орында – алматылық Милена Саприна (31.04). U17  санатындағы барлық ерлер арасында мәреге бірінші болып көкшетаулық Арлан Жаңабай (25:15) жетті. Қостанайлық Руслан Бекенов (25:43) екінші атанса, астаналық Али Жанат (25:47) үшінші болды.

U19 санатындағы қыздар арасында алтынды жасөспірімдер құрамасының мүшесі Аружан Аманжолова (Түркістан обл.) 30:46 уақытымен алып кетті. Екінші орында шымкенттік Хафиза Гультураева (31:21). Осы санаттағы ерлер арасында үздік үштік атану бәсекесінде алматылық спортшылар нағыз үздік нәтиже көрсетті. Мәредегі күресті 23:41 уақыт көрсеткен Даниил Породнов жеңіп алды. Екі секунд қана кешіккен Александр Тен күміс жүлдегер атанса, бір секундтан кейін мәре кескен Егор Крупяков қола жүлдені қанағат тұтты.  

23 жасқа дейінгі санатта сайысқа шыққан Юлия Озерова 28:01 уақытымен мәреге жетті. Алихан Абусеит (Шымкент) U23 санатындағы сайысты жеңіп алды (24:06). Алматылық  Кирилл Рожков (24:41) екінші орыннан көрінсе, түркістандық Ерасыл Аманжолов жеңімпазға елу секунд ұтылып, үштікті қорытындылады.