Премьер-министр Кириакос Мицотакис өткен айда оңшыл үкіметтің осы жазда орман өрттерімен сәтсіз күресі үшін халықтан кешірім сұрауға мәжбүр болған еді. Аптап ыстық себеп болған алапат өрттің кесірінен мыңдаған адам үйсіз қалған. Тұрғындар Мицотакис үкіметін бұл табиғи апатқа дайын болмағаны мен бюрократия үшін айыптады. Ол елдегі ауа райына қатысты апаттарға қарсы күресті ЕО-ның бұрынғы комиссары Христос Стиланидеске сеніп тапсырды. Жаңа басшы дағдарысты басқару саласымен жақсы таныс. Ол – 2013 жылы Еуропаның эбола індетіне қарсы іс-әрекетін үйлестіруге жауап берген жан. Сарапшылар Стиланидес пен оның командасын алда күрделі мәселелер мен міндеттер күтіп тұрғанын айтуда. Халық оның елдегі климаттың өзгеруінен туындаған мәселелерді шешу үшін арнайы тағайындалғанынан хабардар. Ол Грекияның өрт сөндіру қызметтеріне, апаттарда көмек көрсетуге және климаттық дағдарыс салдарын жоюға қатысты саясатты жүзеге асыруға жауап бермек. Әзірге елдің климаттың өзгеруі мен халықты қорғау жөніндегі жаңа министрлігі туралы ақпарат шектеулі. Кейбірі бұл шешімді елдегі саяси шиеленісті өршіте түскен дағдарысты жеңілдететін қадам деп санайды.
