Өрт қауіпсіздігі айының шеңберінде Департамент қызметкерлері жергілікті атқарушы органдармен, жергілікті полиция қызметімен және волонтерлермен бірлесіп тұрғылықты жері бойынша профилактикалық рейдтер жүргізеді, олар халықты пешпен жылыту, электрмен жылыту аспаптарын пайдалану кезіндегі өрт қауіпсіздігі шараларына және өрт туындаған жағдайдағы іс-қимылдарға оқытуға бағытталған. Бүгінгі таңда облыс бойынша 42 мыңнан астам азамат қамтылып, 14 566 тұрғын үйде профилактикалық жұмыстар жүргізілді.
Департамент жылу беру кезеңі басталғанға дейін жылыту пештеріне жөндеу жүргізуді ұсынады, қолданыстағы қағидаларға сәйкес түтін мұржасын тазалауды кемінде 3 айда бір рет жүргізу қажет.
Жылыту пештерінің жанында жиһаз және басқа да жанғыш заттарды орналастыруға тыйым салынады, сондай-ақ пеш жағу үшін тез тұтанатын және жанғыш сұйықтықтарды пайдалануға тыйым салынады.
Бұдан басқа, қолдан жасалған электр қыздырғыш аспаптарын пайдалануға тыйым салынады, бір желіге бірнеше электр аспаптарының қосылуына жол берілмейді, бұл электр желісінің шамадан тыс жүктелуіне әкеп соғады, электр сымдарының, қосқыштардың және розеткалардың ақаусыздығын қадағалау қажет.
Ең бастысы, балаларға тұрмыстық құралдарды өз еркімен пайдалануға рұқсат етпеу, сіріңкелерді олар үшін қол жетпейтін жерлерге қою және кішкентай балаларды ересектердің қарауынсыз үйде жалғыз қалдырмау қажет.
Айта кету керек, азаматтық қорғау органдары білім басқармалары мен бөлімдерімен бірлесіп оқу мекемелерінде өрт қауіпсіздігі ережелерін оқыту бойынша жұмыстар жүргізуде.
2021-2022 жж. оқу кезеңінде білім беру ұйымдарында 2 мыңнан астам адамды қамти отырып 23 интерактивті сабақ, 792 адам қамти отырып 113 дәріс, әңгіме және нұсқамалар өткізілді.
«Егемен-ақпарат»
