Кеше Үкімет басшысы Серік Ахметовтің төрағалығымен Өңірлік даму министрлігінің кеңейтілген алқа мәжілісі болып өтті. Оның жұмысына Премьер-Министрдің бірінші орынбасары Бақытжан Сағынтаев, министрліктің құрылымдық бөлімшелерінің басшылары мен облыстар және Астана, Алматы қалалары әкімдерінің орынбасарлары қатысты.
Кеше Үкімет басшысы Серік Ахметовтің төрағалығымен Өңірлік даму министрлігінің кеңейтілген алқа мәжілісі болып өтті. Оның жұмысына Премьер-Министрдің бірінші орынбасары Бақытжан Сағынтаев, министрліктің құрылымдық бөлімшелерінің басшылары мен облыстар және Астана, Алматы қалалары әкімдерінің орынбасарлары қатысты.
Алқа мәжілісінде ведомствоның 2013 жылғы жұмыс қорытындылары, сонымен қатар, ағымдағы жылға қойылған міндеттері туралы осы министрлік басшысы Болат Жәмішев жасаған баяндамада өңірлерді дамыту, қала құрылысы және жер кадастрын құру жайы, сонымен қатар, «Қолжетімді тұрғын үй», «Моноқалаларды дамыту», «Тұрғын үй-коммуналдық шаруашылықты жаңғырту», «Ақ бұлақ», «Бизнестің жол картасы» бағдарламаларының іске асырылу барысы туралы сөз болды. Б.Жәмішев ел аумағын ұйымдастырудың бас схемасын іске асыру аясында жақындағы үш жыл ішінде Аумақтық дамудың өңіраралық схемасы әзірленетіндігін айтып өтті.
Қазіргі күні «Моноқалаларды дамыту» бағдарламасын жүзеге асыруға екпін берілуде. Олардың коммуналдық саласындағы пайда болған проблемаларды шешу үшін 2013 жылы қаржыландыру көлемі екі есеге ұлғайтылды (6 млрд.-тан 14,8 млрд. теңгеге дейін). Бұл моноқалалардың инженерлік инфрақұрылымдарын дамыту және абаттандыру бойынша 195 жобаны іске асыруға ықпал етті.
2100-ден астам ауылдық елді мекендердегі әлеуметтік және инженерлік инфрақұрылым нысандарын коммуналдық ретке келтіру және жөндеу бойынша 2500 жоба іске асырылды. Бұл ретте, «нені жөндеу қажет және қандай жобаларға қаражат жұмсаған жөн» деген мәселелер ауыл тұрғындарының қатысуымен шешілді.
Министрлік қадағалауында тұрған «Бизнестің жол картасы-2020» бағдарламасы – кәсіпкерлерді қолдаудың ең тиімді тетіктерінің бірі. Бүгінгі күні 36 мыңнан астам кәсіпкер бағдарлама бойынша қолдау шараларымен қамтылып, экономикадағы әрбір 5-ші жаңа жұмыс орны осы істің аясында құрылды.
Тұрғын үй құрылысы мәселелері бойынша министрліктің 2013 жылғы қызметі халықтың тұрғын үйге қолжетімділігін одан әрі арттыруға және үлескерлердің қаражатын қорғау тетіктерін әзірлеуге бағытталды. Тұрғын үйге деген өсіп келе жатқан қажеттілік ескеріле отырып, жергілікті атқарушы органдарда кезекте тұрған адамдар үшін «Тұрғын үй құрылыс жинақ банкі» АҚ, «Қазақстандық ипотекалық компания» АҚ, «Самұрық-Қазына» жылжымайтын мүлік қоры» АҚ арқылы салынып жатқан тұрғын үйлерді сату мәселелері қосымша пысықталу үстінде. Өткен жылы барлық қаржыландыру көздері бойынша тұрғын үй құрылысына 477,8 млрд. теңге инвестиция жұмсалып, салынған қаржы көлемі 2012 жылға қарағанда 7 пайызға артты. Еліміз бойынша 6,8 млн. шаршы метр тұрғын үй салынса, оның 3,6 млн. шаршы метрін немесе 52 пайызын жеке тұрғын үй құрылысы құрады.
Барлық әкімдіктер жалға берілетін тұрғын үйді іске қосу бойынша жылдық жоспарды орындады. Кезекте тұрғандар және жас отбасылар үшін алаңы 389,1 мың шаршы метр болатын 6680 пәтер салынды.
Несие қаражаты есебінен тұрғын үй құрылыс жинақтары жүйесі арқылы тұрғын үй салуға және сатуға 2013 жылы республикалық бюджеттен өңірлерге 29,4 млрд. теңге бөлініп, бұл қаржы 95 пайызға игерілді (несие қаражатын игеру мерзімі – 2 жыл). Оған алаңы 314,6 мың шаршы метр болатын 4 793 пәтер салынып, жылдық жоспар 121 пайызға орындалды.
Алқа мәжілісін қорытындылаған Премьер-Министр Серік Ахметов «Мемлекет басшысының Жарлығына сәйкес құрылған дербес Өңірлік даму министрлігі өңірлік саясатты жүйелендіруді мүмкін етті», дей келе, осыған орай 2013 жылдың аймақтардың ырғақты дамуын қамтамасыз етуде көп жағдайда айқындаушы кезең болғандығын атап көрсетті.
Премьер-Министр өз сөзінде өңірлік дамудың ауқымды мәселелеріне ерекше назар аударды. Атап айтқанда, өңірлік саясатта басымдылық беріліп отырған экономикалық өсім орталықтарын қалыптастыру мәселесіне кеңінен тоқталып өтті.
«Мемлекет басшысының тапсырмасы бойынша Астана, Алматы, Шымкент және Ақтөбе қалаларында осы қалалардың болашақ дамуын негіздейтін агломерациялар құрылуда. Президент біздің алдымызға Астана мен Алматы агломерацияларын дамытудың 2030 жылға дейінгі стратегиясын дайындау міндетін қойды. Бұл маңызды құжат биылғы жылдың соңына дейін әзір болуы керек. Сондықтан, бірлесіп атқаратын бұл жұмыс сіздердің басты назарларыңызда болуы тиіс», деді С.Ахметов.
Осыған орай Премьер-Министр Өңірлік даму министрлігіне әкімдермен бірлесе отырып, даму бағдарламалары шеңберінде барлық қалалар мен аудандарды мемлекеттік қолдау шараларымен толық қамту бойынша қосымша шаралар қабылдауды тапсырды.
«Тұтастай алғанда, министрлік өзіне жүктелген міндетке сәйкес өңірлік дамуға бағытталған барлық бағдарламаларды үйлестіру ісіне ерекше мән беріп, осы істегі мониторингтік шараларды күшейте түсуі керек», деді С.Ахметов.
Үкімет басшысы, сондай-ақ, Президенттің тұрғындардың «Қолжетімді тұрғын үй» бағдарламасына қатысуы жағдайын оңайлату жөніндегі тапсырмасын бұлжытпай орындау қажеттігін ескертті.
«Бұл үшін бағдарламаның барлық бағыттары бойынша үй кезегінде тұрғандардың пәтер алуын ерекше назарда ұстау керек, бағдарламаға қатысушылардың барлығына бірыңғай талап қою мәселесін ретке келтіріп, осыған орай бағдарламаға тиісті түзетулер енгізуді жеделдету қажет», деп атап көрсетті С.Ахметов.
Сөзін қорытындылай келе, Премьер-Министр Мемлекет басшысының тапсырмаларын орындау үшін министрлікке ұзақ-мерзімді экономикалық өсім орталықтарын құру бойынша жұмысты ширата түсуді, осы істегі мемлекеттік қолдау шараларын барынша реттеуді тапсырды.
«Министрлік өңірлерді дамытуға бағытталған бюджет қаржысын тиімді пайдалануға ерекше назар аударып, осы істі үйлестіруді қамтамасыз ететін болсын. Бұл істе министрлік арқылы көрініс табатын «бір терезе» қағидаты облыстар үшін бюджеттік инвестициялық жобаларды бекіту кезінде маңызды буын болуы тиіс», деп атап көрсетті Үкімет басшысы.
Сұңғат ӘЛІПБАЙ,
«Егемен Қазақстан».
