Астанада болашақ олимпиадашыларды даярлайтын тағы бір мекен - «Жас батыр» спорттық-сауықтыру кешені пайдалануға берілді. Бүгін Қ.Мұнайтпасұлы атындағы Олимпиада резерві республикалық мектеп интернат-колледжіне қарасты осы орданың ашылу салтанаты өтті. Бұл туралы egemen.kz тілшісі хабарлады.
Рәсімге Спорт және дене шынықтыру істері агенттігінің төрағасы Тастанбек Есентаев, «Қажымұқан Мұнайтпасұлы атындағы Олимпиада резервінің республикалық мамандандырылған мектеп интернат-колледжі» РММ директоры Серік Төкиев, Олимпиада чемпионы, «Астана» президенттік спорт клубының президенті Бақтияр Артаев, Олимпиаданың күміс және қола жүлдегерлері Георгий Цурцумия мен Арман Шілманов қатысты.
Рәсімде агенттік төрағасы спорт кешенін аралап, жаңа пайдалануға берілген спорт нысанының құрылысына жоғары баға берді. Онда атақты балуан Қажымұқан атындағы спорт ордасының оқытушылар құрамы мен оқушыларының алдында сөз сөйлеп, талай даңқты спортшыларымызды түлеп ұшырған мектептің қабырғасынан алдағы уақытта да еліміздің намысын қолдан бермейтіне, көк байрағымызды биікке көтеретін саңлақтарымыздың шығатынына сенім білдірді. Ал оқу орны оқушыларының атынан Қазақстан чемпионы, ІІІ Жастар ойындарының жеңімпазы Мадияр Жанұзақ сөз алып, спорт кешені үшін ризашылығын жеткізді.
Кешеннің құрылысы 2011 жылы басталған. Мұнда бір күнде 300 адам жаттыға алады. Әр айналымда он адам орыннан секіріп, сегіз адам ядро лақтыратындай мүмкіндік те жасалған.
Дастан Кенжалин.
Дереккөз: «Жас батыр» спорттық-сауықтыру кешені.
Фото: Мақсұт Іржанов.
