Кәсіп иелері алдымен топырақ құрамын зерттеген. Керегі де осы. Құнарсыз, айтақыр жерден табыс табу әсте мүмкін емес қой. Ойға алғандары орындалса, одан кейінгі шаруа – дайын өнімді өткізу. Бұл орайда бас қатыратын ештеңе жоқ. Тұтынушысы мол Нұр-Сұлтан қаласы іргеде. Жылыжай салынған Ыбырай Алтынсарин ауылы астанадан атшаптырым жерде.
Оң-солын ақыл таразысына салып сараптағаннан кейін 1 гектар жерге қызанақтың екі түрі егілді. Жылыжайдың өнімі де жаман емес, барлық технологиялық талап мүлтіксіз сақталғаннан кейін қаулап өсе бастады. Қылтиып жер бетіне шығысымен-ақ көңіл орныққан. Жылына 20 мың тонна өнім жинауға толық мүмкіндік бар. Өздерінің межелеп отырғандары да осы. Жылыжай директоры Абзал Оразымбековтің айтуына қарағанда, Нұр-Сұлтан қаласына сырттан тасымалданатын, бағасы удай көкөніс көлемін шектеп, жергілікті өнімді молынан ұсынуға болады.
– Бастаған ісіміздің берекесі «Еңбек» мемлекеттік бағдарламасының шарапатымен үйіріліп тұр, – дейді Аibol eco product компаниясының жетекшісі Абзал Оразымбеков. – Ауыл шаруашылығын қаржылай қолдау қорынан 4 млн теңге несие алдық. Өсімталдығы дәлелденген, Голландия селекционерлерінің тиянақты тәжірибесінен өткізілген екі түрлі тұқым ектік. Қазір жылыжайдың жалпы аумағы 2 мың шаршы метр, онда 6 мың түп орналастырылды. Алдағы уақытта жылыжай көлемін тағы да екі гектарға ұлғайтсақ па деп отырмыз. Карантинге байланысты аздаған қиындық болғанымен, азық-түлік молшылығын жасау бағытында жұмыс істеп жатырмыз.
Кешеннің құрылысы қаңтар айында басталған. Жалпы құны 13 млн теңге төңірегінде. Қолбайлау болып отырған жалғыз жай – жылыжайға қажетті су. Мамандардың айтуына қарағанда, су жеткілікті болмаса, қызанақ тамыры зақымданбақ. Жапырақтары әлсіреп, оратылып қалады. Сол сәтте жапырақ та фотосинтез процесін ала алмай, түйіндерге бағытталар күш кемиді. Айналып келгенде, бар еңбек зая болмаса да, зиян көбеймек.
Әзірге суды тасымалдап, көкөністерін суарып отыр. Аудан әкімдігі қауырт науқан – егін орағы аяқталған соң қолұшын беруге уәде етті. Тіршілік нәрі тікелей тартылса, жылыжай ауқымы да кеңейтіліп, жаңа жұмыс орындары ашылмақ. Сол кезде жергілікті өнім көлемін көбейтуге мүмкіндік туады.
Ақмола облысы,
Целиноград ауданы
