Еске салсақ, былтыр пандемия кезінде «Қазақстан» корпорациясы мәдени-рухани бағыттағы Abai TV телеарнасын ашқан еді. Содан кейін түркітілдес, көршілес елдердің тарихына, мәдениетіне қатысты өнім алмасу мақсатында барлық мемлекет өкілдеріне сұраныс-хат жолданды.
XVII Еуразия медиафорумы аясында баяндама жасаған корпорация басшысы Ләззат Танысбай екіжақты байланыстың нәтижесінде қазір Abai TV эфирінен түркиялық әріптестеріміз дайындаған бірнеше деректі фильм көрсетіліп жатқанын айтты. «Біз оларды дубляждап, өз тілімізде көрерменге ұсынамыз және өзге елдердің де өнімдерін қазақ тіліне аударып, эфирден беруге дайын екенімізді жеткізгіміз келеді. Телеиндустрия өте қарқынды дамып жатқан қазіргі кезде тек контент алмасып қана қоймай, тәжірибе алмасқанымыз да өте маңызды деп есептейміз. Мысалы, біздің корпорация мамандары Түркияның озық телеарналарына жиі барып тұрады, жақында ғана көршілес Қырғызстанның телеарналарының басшылары келіп пікір алмасты, студияларымызды көрді, ортақ меморандумға қол қойдық. Нәтижесінде, қырғыз тарапымен бірлесіп, ұлы жазушы Шыңғыс Айматовқа арналған деректі фильм түсіріп жатырмыз», деді корпорация басшысы.
Фильмнің негізгі лейтмотиві Шыңғыс Айтматовтың шығармашылығына құрылған. Сондай-ақ жазушының екі ел арасындағы әдеби-мәдени байланысты нығайту жолында атқарған еңбектері баяндалады. Түсіру тобы Айтматовтың ауылы Шекерде болып, ондағы жазушының шығармаларына арқау болған деректі орындарды түсіріп қайтқан. Қырғыз-қазақ бірлескен деректі фильмі екі ел арасындағы тарихи достық қарым-қатынасты насихаттау үшін жасалып отыр.
Бұдан бөлек, Ләззат Танысбай Balapan балалар телеарнасы қырғыз аниматорларымен бірлесіп, ғарыш саласы туралы анимациялық жоба түсіріліміне дайындық бастағанын атап өтті. «Қазіргі уақытта Қазақстан бұл сала бойынша бірқатар табысқа қол жеткізді, өнімдеріміз сыртқы нарыққа шыға бастады. Елдегі балаларға арналған Balapan телеарнасы анимация өндірісінің дамуына ерекше серпін беріп отыр. Жылына 250-300 бөлімді құрайтын 20-25 анимациялық туынды шығарып отырмыз. Түркітілдес елдерді біртұтас түркі тарихын көрсететін анимациялық жобалар өндірісіне атсалысуға шақырамыз», деді басқарма төрағасы.
