«Тірі болсам, қазаққа қызмет қылмай қоймаймын», деп басын бәйгеге тіккен бабамыз дәл бүгін, 27 қыркүйек күні дүниеден өткен.
Ескерткіш ауылдағы мәдениет үйінің алдына орнатылған. Биіктігі тұғырымен қоса есептегенде 3 метрден асады. Қоладан құйылған, авторы – Қазақстан суретшілер одағының мүшесі Бейбіт Мұстафин. Рухани тағылымы мол істі жүзеге асыруға ауыл азаматтары демеушілік көрсеткен. Салтанатты ашылу рәсімінен кейін ғылыми-тәжірибелік конференция өтіп, «Әлихан – Алаш Ақсораңы» кітабының тұсауы кесілді.
Онда ғалымдардың, тарихшылардың «Алаш» идеясы жайлы еңбектері топтастырылған. Айта кету керек, биыл туғанына 155 жыл толған ұлтымыздың ұлы тұлғасы дәл осы Шабанбай би ауылы маңында дүниеге келген.
«Әлихан Бөкейханов қазақ ұлтының бүкіл мың жыл бұрынғы, кейінгі күрес күндеріндегі өткен-кеткен тарихын талдап, тұжырымдап, біртұтас «Алаш» идеясын кіріктіріп берген тұлға. Өзінің туған жерінде тұғырға көтерілген ескерткіш сол ұрпақтардың Әлекеңді түсіне бастағанының, рухының сіңе бастағанының кепілі», дейді филология ғылымдарының докторы, алаштанушы Тұрсын Жұртбай.
