Жыршы-жыраулар байқауының ашылу рәсімінде облыс әкімі Гүлшара Әбдіқалықова сайысқа қатысушыларға сәттілік тіледі.
– Ежелгі ұзандардың ізі қалған, үні сақталған Сырда дәстүрлі жырдың байрағы биік тұратыны белгілі. Қобыз сарынынан дүние тылсымын іздеген Қорқыттан бастау алатын бағзы өнердің рухани қазынаға айналуына өлшеусіз еңбек еткен Шораяқтың Омары, Балқы Базар, Қарасақал Ерімбет, Кете Жүсіп, Дүр Оңғар, Тұрмағамбет, Нұртуған мен Нартайдай дүлдүлдер дүниеге келген топырақтағы бүгінгі жыр сайысы дәстүрлі мұраның өшпейтіндігін айғақтайды, – деді облыс әкімі.
Жыр додасында бағзы өнердің әлемдік деңгейде насихатталуына үлес қосып, жыр керуеніне талай талантты шоғырды тәрбиелеп қосқан белгілі жырау, Қазақстанның еңбек сіңірген қайраткері, Құрманғазы атындағы Қазақ ұлттық консерваториясы және Қазақ ұлттық өнер университетінің профессоры Алмас Алматов, Қазақстанның еңбек сіңірген қайраткері, өнертану ғылымдарының кандидаты, Қазақ ұлттық өнер университетінің профессоры Елмұра Жаңабергенова, Қазақстанның еңбек сіңірген қайраткері, филология ғылымдарының кандидаты, Құрманғазы атындағы Қазақ ұлттық консерваториясының аға оқытушысы Ұлжан Байбосынова, қоғам қайраткері, өнер жанашыры Рзақұл Нұртаев, жыршы-жырау, «Мәдениет саласының үздігі» төсбелгісінің иегері Майра Сәрсенбаева қазылық етті.
Жыр додасына Ақтөбе қаласынан Демеубай Жолымбетов, Маңғыстаудан Амангелді Сәңкібаев, Кереку өңірінен Бөкен Жігер, Алматы қаласынан Бақыт Тоғжанова, Қызылорда қаласынан Әділхан Қуаңбаев, Болат Баймұратов, Серік Жақсығұлов, Жақсан Жәнібек, Малика Алдамжарова, Арал ауданынан Айбек Тәңірбергенов пен Бексұлтан Орынбасар, Шиеліден Мұхамедәлі Бекпейісов, Қармақшы ауданынан Әлішер Мырзағалиев қатысып, Жүсіп Ешниязұлының бұрын-соңды көп орындалмай жүрген айтыс, термелері мен «Шәһзада», «Сұрмерген», «Мекер қатын» дастандарын орындады.
Қазылар алқасының төрағасы Алмас Алматов Сыр сүлейінің мол мұрасын насихаттауда үш буын өкілдерінің басын қосқан бүгінгі іс-шара аймақтың мәдениет саласындағы айтулы бастамасының бірі болғандығын атап өтті.
– Бұрын орындаушыларымыз концерттік жүйе бойынша 4-5 минут қана өнер көрсетіп, мүмкіндігін толық көрсете алмай жататын. Бұл жолы сахнаға шыққандарға жарты сағат уақыт берілді. Алда жыршы-жыраулардың алдына қоятын мақсат, міндеттер күрделене бермек. Мысалы, Ақтөбе облысында «Қырымның қырық батырын» 30 жыршы-жырау
60 сағат жырлады. Өнер иесін кемелдендіріп, шеберлігін шыңдай түсетін осындай бастама Сырда да қолға алынып жатыр, – деді жырау.
Осы күні «Жырлансын, Тәуелсіздік жыр бұлағы» атты республикалық байқау өз мәресіне жетті. Қазылар алқасының шешімімен бас жүлде аралдық Айбек Тәңірбергеновке табысталды. Бірінші орын қызылордалық Серік Жақсығұловқа берілсе, ІІ орынды ақтөбелік Демеубай Жолымбетов жеңіп алды. ІІІ орынды Павлодар қаласынан Бөкен Жігер, Қызылорда қаласынан Жақсан Жәнібек және Арал ауданынан Бексұлтан Орынбасар өзара бөлісті. Қалған қатысушыларға ынталандыру сыйлығы бұйырды.
