Таяуда «АрселорМиттал Теміртау» компаниясы осы бағытта игі іс-шара ұйымдастырып, вакцина салдырған қызметкерлер арасында екі Lada Vesta автокөлігін ұтысқа ойнатты.
Онлайн режімінде болат және көмір департаменттерінің қызметкерлері арасында өткен ұтыс ойынында жеңімпаздар кездейсоқ сандар генераторының көмегімен анықталды. Ойынның ашықтығын қамтамасыз ету мақсатында бақылаушылар ретінде кәсіподақ өкілдері мен қызметкерлері, сондай-ақ журналистер мен блогерлер қатысты.
Ұтыс ойынының қорытындысы бойынша, металлургия зауытындағы конверторлық цехтың дәнекерлеуші-жөндеушісі Нұрхан Смағұлов пен Түсіп Күзембаев атындағы шахтаның желдету және қауіпсіздік техникасы учаскесінің жерасты электр слесарі Талғат Шауғымбеков жеңімпаз деп танылып, су жаңа темір тұлпарларды тақымға басты.
Ұтыс иегерінің бірі Нұрхан Смағұловтың компанияда жұмыс істеп жүргеніне бір жыл да болмаған. Жолы болғыш жұмысшы автокөлік ұтқанын түнгі ауысымнан келген бетте цехтағы әріптестерінен естіпті.
Ал екінші ұтыскер Талғат Шауғымбеков болса, ойын онлайн өтіп жатқанда жер астындағы жұмыс нарядын орындап жүріпті. Автомобильге ие болғанын жер үстіне көтерілгенде бір-ақ естіген.
Темір тұлпарлардан бөлек, онлайн ұтыс кезінде тұрмыстық техниканы сатып алуға әрқайсысының номиналы 50 мың теңге болатын 20 сертификат та ойнатылды.
Бұл игі жоба алдағы уақытта да жалғасын табатынын айтады ұйымдастырушылар. Мысалы, 14 қазан күні темір кені департаменті мен еншілес кәсіпорындар қызметкерлері арасында тағы да автокөліктер ойнатылмақшы.
Қарағанды облысы
