2 қазанда сайлаушылар жергілікті өзін өзі басқару органдарының (сакребуло) 2 мыңнан астам мүшесін және Тбилиси, Кутаиси, Поти, Батумиді қоса алғанда, 64 қаланың әкімдерін таңдады. 3,4 миллион азаматтың дауыс беру құқығы бар, 241 адам әкім болуға, ал 2,8 мың үміткер қалалық кеңестерге өз кандидатурасын ұсынған.
Биылғы жағдай 2012 жылдан басталған сайлау науқандарымен ұқсас. Негізгі дода билеуші «Грузин арманы» мен «Біртұтас ұлттық қозғалыс» оппозициясының арасында өрбіді. Сайлауға барлығы 40-тан астам партияның өкілдері қатысты.
Бұл сайлау Грузияда қалыптасқан ішкі саяси дағдарыстың тағы бір кезеңі болды. Жағдай 2020 жылдың күзінде өткен парламенттік сайлаудан кейін тағы ушыға түскен. Сайлауда «Грузин арманы» партиясы басымдықпен жеңіп, өзге тоғыз оппозициялық партия парламентке өткен. Алайда олардың барлығы дерлік сайлау кезіндегі заң бұзушылықтарды айта келе, жаңа Парламентте жұмыс істеуден бас тартқан. Саяси тығырықтан шығатын жолды табу үшін Еуропалық Кеңестің басшысы Шарль Мишель араласуға мәжбүр болған.
Дауыс беру аяқталғаннан кейін шығарылған exit poll нәтижесі бойынша билеуші партия алда келе жатқаны белгілі болды.
Грузия оппозициясы жергілікті сайлаудың нәтижелерін билікке деген сенімнің «референдумы» ретінде қарастырып отыр. 2021 жылдың сәуірінде Еуропалық Кеңестің президенті Шарль Мишельдің делдалдығымен «Грузин арманы» партиясы мен бірнеше оппозициялық партия арасында Грузияның саяси дағдарыстан шығуы туралы келісімге қол қойылған. Құжатта бірқатар реформа қарастырылған, сонымен қатар егер билеуші партия жергілікті сайлауда 43%-дан астам дауыс жинай алмаса, мерзімінен бұрын парламенттік сайлау өткізетіні туралы да ереже бар. Алайда кейінірек билеуші «Грузин арманы» партиясы бұл келісімнен шықты. Оның өкілдері егер билеуші партия жергілікті сайлауда 1% дауыс жинаса да, мерзімінен бұрын парламенттік сайлау болмайтынын мәлімдеген.
Сондай-ақ 1 қазанда Грузия премьер-министрі Ираклий Гарибашвили өткізген төтенше брифингте сайлауға орай елге оралған экс-президент Михаил Саакашвилидің қамауға алынғаны белгілі болды.
