Қазақстан Республикасы Президентінің Архиві өңірлік архивтермен серіктестік қарым-қатынас орнатуға аса көңіл бөліп келеді. 2017 жылдан бастап аймақтардағы архив мекемелерімен бірлескен ғылыми-зерттеулерді жүргізу, тарихи-құжаттық көрмелерді дайындау, дөңгелек үстелдерді ұйымдастыру, тәжірибе алмасу және тағы басқа жобаларды жүзеге асыруды қамтитын «Қазақстан Республикасы Президенті Архивінің өңірлердегі күндері» шаралар кешені өткізілуде. Мұндай шаралардың ұйымдастырылуы Қазақстан Республикасы Ұлттық архив қорының құжаттарын әйгілеп, насихаттауға және архившілердің кәсіби мәселелерді бірлесе отырып шешуіне де бағытталған.
Әріптестерімен басқосу барысында Президент Архивінің директоры Жәмилә Әбдіқадырова отандық архив саласының алдында тұрған өзекті міндеттерге тоқталды.
– Қазіргі уақытта архив саласы кадрлық әлеуетті сақтап қалу және күшейту бойынша тиісті шараларды қабылдауды қажет етеді. Бұған қоса, архив саласында жаңа бағыттар қалыптасуда, заманауи технологиялар қолға алынып, жұмыс әдістері жетілдірілуде, – деп атап өтті.
Жәмилә Әбдіқадырова өз баяндамасында Мемлекет басшысы Қасым-Жомарт Тоқаевтың «Халық бірлігі және жүйелі реформалар – Ел өркендеуінің берік негізі» атты биылғы Қазақстан халқына Жолдауында айтылған «Қазір Қазақстан мүлде жаңа дәуірге қадам басты. Соған сәйкес қоғамдық өмірдің барлық саласы түбегейлі өзгеруде. Жаһанды тұрақсыздық жайлап, көптеген жаңа сын-қатер пайда болып жатқан кезде біз бағдарымызды бекемдеп, болашаққа көзқарасымызды айқындай түсуіміз қажет», деген ойды басты негізге алды. Президенттің бұл пайымы бізді Қазақстан Республикасы, Тұңғыш Президенті – Елбасы Нұрсұлтан Назарбаевтың «Бүгінгі күнді түсініп-түйсіну үшін де, болашақтын дидарын көзге елестету үшін де кешегі кезеңге көз жіберуіміз керек», деген тұжырымына назар аудартады.
Шараның ашылуында Маңғыстау облысы мемлекеттік архивінің директоры Минара Сәдімекова да сөз алды. Архивтік құжаттарды насихаттау және оларға қол жеткізу мақсатында, Тәуелсіздік жылдары көптеген кітаптар мен құжаттар жинағы, атап айтқанда, «Жемчужина Каспия», «Летопись города Актау», «Берекелі Бейнеу», «Қарашаңырақ» және тағы басқа кітаптар жарық көрді. Кеңестік саясатты күштеп енгізуге, зорлық-зомбылыққа ашық қарсы шыққан батырлардың бірі Т.Құрмаш туралы «Тоқабай Құрмаш» кітабы да осы кезеңде дайындалды. «Маңғыстаудың азалы жылдары» кітабына Маңғыстау облысындағы 1920-1940 жылдардағы қуғын-сүргін жөніндегі құжаттар мен мақалалар, естеліктер енген. «Адай көтерілісі» екі томдық жинағына 1931 жылы Гурьев округіндегі Адай көтерілісі туралы құжаттар жарияланған. Жинақтағы құжаттар 1928-1933 жылдар аралығын қамтиды.
Ш.Уәлиханов атындағыТарих және этнология институтының директоры Зиябек Қабылдинов баяндамасында жаңадан шыққан «Ашаршылық. Голод. Документальная хроника. 1928-1934 гг.»
құжаттық жинағымен таныстырды. Сондай-ақ олТарих және этнология институтының Қазақстандағы жаппай қуғын-сүргінге негіз болған құжаттар енгізілген ХХ ғасырдың 1920-50 жылдарындағы саяси репрессия тарихына байланысты жинақтың әзірленіп жатқанын айтты. Зиябек Қабылдинов Президент Архиві мамандарына жүгінгенін, себебі отандық архившілердің қатысуынсыз бұл жинақты жарыққа шығарудың мүмкін еместігін атап өтті.
Шараның бағдарламасына сәйкес Президент Архивінің құжаттарды пайдалануды ұйымдастыру басқармасының басшысы Бөлеген Қасенов қатысушыларға «Тәуелсіздік дәуірі: ҚР Президенті Архиві қорларынан» тақырыбындағы тарихи-құжаттық көрмемен онлайн форматта таныстырды. Маңғыстау облысы мемлекеттік архивінің коллекциясынан «Қазақстан РеспубликасыТәуелсіздігінің 30 жылдығына орай» тақырыбындағы тарихи-құжаттық онлайн көрмеге Архив құжаттарын пайдалану және жариялау бөлімінің маманыАйжан Абдулина шолу жасады.
Маңғыстау облысы мемлекеттік архивінің бас сарапшысы Жанат Нұрмаханова өз баяндамасында «Тағзым» бес томдық құжаттық жинағы туралы айтты. Жинақта архив материалдарынан деректер, Ұлы Отан соғысының ардагерлері туралы естеліктер, соғыс кезіндегі тыл ардагерлері мен еңбек адамдарының қызметі туралы ақпараттар, фотокөшірмелер және басқа да материалдар түпнұсқадан көшіріліп келтірілген.
«Мемлекеттік архивтер жұмысының негізгі бағыттары: нормативтік-әдістемелік база және тәжірибе» атты семинарда Президент Архивінің қызметкерлері ведомстволық архивтермен жұмысты ұйымдастыру, архив құжаттарын есепке алу, сақтау және оларды пайдалану бойынша тәжірибелерімен бөлісті.
