Өнер ұжымы Қазақстан Тәуелсіздігінің 30 жылдығы мен Дүниежүзі қазақтарының кіші құрылтайы аясындағы іс-шараға арнайы шақырылған болатын.
Концерттік бірлестіктің жетекшісі Талғат Ыдырысов кіші құрылтайға қатысып, сонымен бірге Алания, Анталия, Хатай, Газиантеп, Ыстанбұл және Конья қалаларында концерт бергендерін хабардар етті.
– Оркестрдің концерттерін Түркияның 10 мыңнан астам көрермені тамашалады. ЭКСПО-ның ашылуына дайындалып жатқан Хатайда амфитеатр залын бірінші болып сынап көру сәті түсті. Бізге ЭКСПО ашылуында да өнер көрсету туралы ұсыныс түсті, – дейді Т.Ыдырысов.
Ал Тәттімбет оркестрінің дирижері Ерлан Бақтыгерей болса, түрік көрермендерінің ұлттық музыкалық аспаптарымыздың үніне айрықша таңғалып, ерекше әсерге бөленгендерін атап өтті.
– Дәулеткерей, Құрманғазы, Тәттімбет, Махамбеттің күйлері мен Нұрғиса Тілендиевтің заманауи әндерін орындадық. Сонымен қатар белгілі түрік композиторларының шығармалары, түрік әндеріне попурри орындалды. Көрермендерге ұнағаны сонша, олар орындарынан тұрып кетіп, би биледі, ән салды, – дейді дирижер.
Алдағы күндері аталған өнер ұжымы жаңа концерттік маусымын ашады. Оркестр репертуарында қазақ және орыс классиктерінің шығармалары, сондай-ақ гастрольдер бағдарламасынан әндер болады деп жоспарланған.
