Алдын-ала жасалған есепке қарағанда, гектар берекесі 8,6 центнерден айналуда. Көктемнің қамын күзде ойлайтын диқандар 529,8 мың тонна сапалы тұқымды қамбаларына құйып алды. Бұл қажетті көрсеткіштің 91,6 пайызы. Күзгі дала жұмыстарына тиянақты дайындалған Есіл ауданының диқандары облыста егін орағын бірінші болып аяқтады. Аудан әкімінің орынбасары Асқарбек Мақсымханның айтуына қарағанда, аудан диқандары 438,2 мың гектар алқаптан 306,7 мың тонна алтын астық жинап алған.
– Гектар берекесі 7 центнерден айналды. Биылғыдай қуаңшылық жылы тәубе дерлік, – дейді аудан әкімінің орынбасары, – көктемгі егіске қажетті 45,5 мың тонна тұқым тазартылып, қамбаға құйылды. Ауданда «Заречный» және «Ново-Приречный» серіктестіктері жауапты науқанды алғашқылардың бірі болып тап-тұйнақтай етіп аяқтап шықты. Бұл серіктестіктердің әрқайсысы 30 мың гектар алқапқа егілген дәнді және бұршақ дақылдарын жинап алды.
Бүгінде еңбек майданының екпіні қызыл қырманға ауған. Диқандар дәнді дақылдар жиналып алынған алқаптарда жер өңдеу жұмыстарын бастап кетті. Бір айта кетерлігі, қауқары мол серіктестіктер әлеуметтік жағынан аз қамтылған отбасыларын қысқа қажетті мал азығымен толық қамтамасыз етті. Бұл жұмысқа аудандағы отызға жуық ірі серіктестіктер мен жүзден астам шаруасы ширақ қожалықтар бір кісідей атсалысқан.
Ерен еңбегімен танылған есілдіктердің өкшесін Жарқайың, Атбасар ауданының диқандары да басып келеді. Айталық, жері құнарлы Жарқайың ауданының егістік алқабы – 615,7 мың гектар. Облыстағы ең ірі аудан санатында. Бұл ауданда да еңбек екпіні өзгелерге үлгі боларлықтай. Бүгінге дейін барлық егіс алқабындағы 588 мың гектар жердің өнімі жиналып, 294 мың тонна астық қырмандарға жеткізілді. Машина-трактор паркін біршама жаңғырту арқылы еңбек өнімділігі де жоғары. Ашық күндері 20 мың гектарға жуық алқап орылады. Гектар берекесі орташа есеппен 7,5 центнерден айналуда. Көктемгі егіске қажетті 63 мың тонна тұқымның 95,2 пайызы қамбаға құйылды.
Атбасарлық диқандар биыл 373,4 мың гектар жерге дәнді дақылдар тұқымын сіңірген болатын. Күннің әрбір ашық сәтін тиімді пайдаланған аудан диқандары барлық алқаптың 95 пайызын жинап алды. Жерде өнгенді жерде қалдырмауға тырысқан еңбеккерлер 265,6 мың тонна астық бастырды. Бұл ауданда да гектар берекесі 7,5 центнерден айналуда. Қажетті тұқымның толық қоры жасалды.
Сандықтау ауданының диқандары қуаңшылық жылдың өзінде де тәп-тәуір өнім өсірді. Аудандағы 306,4 мың гектар алқапта өсірілген дәнді дақылдардың 91,6 пайызы жиналды. Өзге аудандарға қарағанда биыл Сандықтаудың ырысы біршама мол екенін айта кетелік. Гектар берекесі 12,7 центнерден айналуда. Аудандағы «Белградское», «USАгро» серіктестіктері мен «Любимовы» шаруа қожалығы егін орағын ерте аяқтады. Дәнді дақылдар алқаптарының кей тұсындағы түсім де жоғары. Айталық, «Белгородское» серіктестігі 17,5, «Свободное» серіктестігі 20, «Максимовка» серіктестігі 21,2 центнерден өнім жинады.
Көрсеткіштерге көңіл аударсаңыз, бір алқаптың жомарт, бір алқаптың сараң екендігін байқайсыз. Топырақ құрамы, табиғаты біркелкі өңірдегі өнім көлемі әрқилы. Демек жер де тілін тапқанға иеді-ау.
