Кеше Еңбек және халықты әлеуметтік қорғау министрлігінде Премьер-Министрдің орынбасары Гүлшара Әбдіқалықованың қатысуымен кеңейтілген алқа отырысы өтіп, онда Мемлекет басшысының «Қазақстан жолы – 2050: бір мақсат, бір мүдде, бір болашақ» атты Қазақстан халқына Жолдауын іске асыру аясында әлеуметтік еңбек саласын дамытудағы негізгі міндеттер талқыланды. Жиында негізгі баяндаманы Еңбек және халықты әлеуметтік қорғау министрі Тамара Дүйсенова жасады.
«Өткен жылы әлеуметтік дамытудың көптеген арқаулық көрсеткіштері бойынша оң нәтижелерге қол жеткізіліп, халықты жұмыспен қамту деңгейі арттырылды. Бүгінгі таңда 95 пайыз еңбек етуге қабілетті қазақстандық азаматтың жұмысы бар, «Жұмыспен қамтудың жол картасы-2020» бағдарламасын іске асыру жалғастырылуда. Осының аясында 250 мыңнан астам адам жұмысқа орналасты. Жалақы, әлеуметтік төлемдер мен жәрдемақыларды арттыру бойынша да жоспарлы жұмыстар жүргізілуде. Экономикалық қызметтің түрлері бойынша орташа айлық жалақы 108 640 теңгені құрап, 2012 жылғы деңгейден 7,5 пайызға артты», деді министр Т.Дүйсенова.
4 миллионға жуық адам әлеуметтік төлем түрлерін алса, балалы отбасыларды қолдау бала туу санының артуына оң ықпал еткен. Соңғы он жыл ішінде бала туу саны бір жарым есеге өскен. Екі жүз мыңдай отбасы 4 және одан да көп бала тәрбиелеп отыр.
Мүмкіндігі шектеулі жандардың тыныс-тіршілігі үшін лайықты орта құру, оңалту және қажетті жағдай жасау шаралары қабылдануда. Сондай-ақ, табысы аз халықты әлеуметтік қолдау мақсатында жұмыспен қамтуға ықпал етуде де шаралар қабылдануда және әлеуметтік жәрдемақылар да төленуде.
90 мыңнан астам адамға тегін арнаулы әлеуметтік қызмет көрсетіледі. Әлеуметтік қамсыздандыру жүйесін реформалау нәтижесінде жұмыс істеп тұрған әлеуметтік медицина мекемелерінің баламалы нысанына айналған 35 күндіз қабылдау мекемесі құрылып, онда 3 мыңнан астам адамға қызмет көрсетілуде. 343 мүгедек бала психоневрологиялық МӘМ-нен отбасыларына оралды. Балаларына күндіз болу бөлімшелерінде қызмет көрсетілетін 410 ата-ана жұмысқа орналасып алған.
Жұмыс берушілердің еңбек жағдайларын үнемі жақсартып тұруға қызығушылығын арттыру мақсатында зейнетақымен қамсыздандыру туралы заңнамаға өзгеріс енгізілген. Өндірістік объектілерді аттестаттау нәтижелерімен расталған зиянды (ерекше зиянды) және қауіпті еңбек жағдайлары болмаған жағдайда жұмыс берушілер міндетті кәсіптік зейнетақы жарналарын төлеуден босатылмақ.
Министр Т.Дүйсенова отырыста Елбасының биылғы Жолдауындағы тапсырмаларға орай биылғы жылға арналған басты міндеттерді де белгіледі. «Жұмыспен қамтудың жол картасы-2020»-ның тиімділігін арттыру бойынша Шығыс Қазақстан, Солтүстік Қазақстан және Павлодар облыстарында бағдарламаға қатысуға үміткерлер арасында кәсіби бағдарлауды енгізу тетіктері сыналмақ. Алматы, Ақмола, Шығыс Қазақстан, Павлодар облыстарында қанатқақты режімде тірек ауылдарды кешенді дамыту тетіктері сыналатын ауылдық елді мекендер белгіленбек. Бұрынғы жеке бизнесін ашуға азаматтарға қолдау көрсетілген кездегі шарттардан ерекшелігі, мемлекеттік қолдау шаралары азаматтардың нәтижелі жұмыспен қамтылуын қамтамасыз ету үшін даму әлеуеті жоғары ауылдарды дамытуға шоғырландырылмақ. Сонымен қатар, бағдарламаны қаржыландыруда жаңа тәсілдер енгізілуде. Келесі жылдан бастап бюджет қаражаты 80 пайыз халықтың санына тепе-тең түрде, 20 пайыз өткен кезеңдегі жұмыс нәтижесіне байланысты бөлінетін болады.
Алқа отырысын қорытындылаған Премьер-Министрдің орынбасары Гүлшара Әбдіқалықова алда азаматтық қызметшілердің еңбекақысының жаңа үлгісін әзірлеп, 2015 жылғы 1 шілдеден бастап енгізу міндеті тұрғанын айтты. Сондай-ақ, ол әлеуметтік көмек көрсету тәртіптерін одан әрі жетілдіру қажеттігін де назардан тыс қалдырмады.
Әбдірахман ҚЫДЫРБЕК,
«Егемен Қазақстан».
