Қазақстан құрама командасы мүшелері арасынан Айша Уәлишан (55 кило), Аяулым Қасымова (62 кило) және Елмира Сыздықова (76 кило) «ә» дегеннен сүрінді. Айша үндістандық Пинки Пинкиден жеңілді – 1:4. Аяулым украиналық Илона Прокоповюкке жол берді – 1:12. Елмира Сыздықованың мысырлық Самар Амер Ибрагим Хамзаға әлі жетпеді – 2:3. Одан кейін Асылзат Сағымбай (53 кило) молдовалық Юлия Леордан таза ұтылды. Айна Теміртасова (65 кило) румыниялық Кристина Тунде Ингзеден басым түскенімен, ширек финалда жапониялық Мира Морикаваның осал тұсын таба алмады – 2:6. Десек те Асылзат пен Айнаның қарсыластары ақтық сынға дейін алқынбай жетіп, біздің қыздар жұбаныш белдесулерінде бақ сынау мүмкіндігін сақтап қалды. Бірақ одан әріге олардың әлі жетпеді.
Есесіне бізді Жәмила Бақбергенова қуантты. 72 кило салмақта күрескен қызымыз ширек финалда франциялық Ванэсса Весаннан 2:10 есебімен жеңіліп жатса да, жігері жасыған жоқ. Шешуші тұста ширек қимылдаған ол таразы басын теңестіріп қана қоймай, қарсыласының уысынан жеңісті жұлып әкетті. Жартылай финалда Жәмила түркиялық Буса Кавусоглудың тас-талқанын шығарды – 13:2. Осылайша, бас жүлде үшін таласу мүмкіндігіне ие болған қазақ қызы жапониялық Масако Фуручимен күш сынасты. Сондай-ақ кеше Налуфар Раимова (57 кило) мен Диана Каюмова (59 кило) жұбаныш бәсекелерінде бақ сынады.
Осы күнге дейін алты салмақ дәрежесі бойынша жеңіс тұғырына көтерілген балуандардың есімдері белгілі. Әзірге Жапония құрамасының қарқыны өте күшті. Күншығыс елінің өкілдері үш салмақта топ жарып, одан бөлек, бір күміс пен бір қола медальды олжалады. Екінші орында – АҚШ. Алыстағы Америкадан келген қыздардың біреуі алдына жан салмаса, екеуі финалда ұтылды. Тағы екеуі үшінші сатыға табан тіреді. Үшінші орынды Молдова еншілеуде. Олар бір алтын мен бір күмісті иемденді. Қоржынында бір алтын мен бір қоласы бар Қырғызстан төртінші сатыға тұрақтауда. Бесінші және алтыншы орындарды Германия мен Эстония еншілеуде. Бұл елдің өкілдері финалда ғана сүрінді.
Жоғарыда аталған командалар арасында Қырғызстан құрамасының табысына таңданбау әрі тамсанбау мүмкін емес. Кеше ғана осы елдің еркін күрес шеберлері қос жүлдені иеленіп, жалпы есепте үздік алтылықтың қатарынан көрінсе, енді бүгін қыздары төрткүл дүние жанкүйерлеріне таңдай қаққызып отыр. Егер әлем чемпионатының тарихына үңілсек, әйелдер күресінен олар күні бүгінге дейін бір алтын мен бір қолаға ғана қол жеткізген екен. Екеуі де – Айсұлу Тыныбаеваның еншісінде. Қырғыздың бағына туған қыз 2017 жылы Парижде үшінші орынға табан тіресе, 2019 жылы Нұр-Сұлтанда алтыннан алқа тақты.
Ал Ослода Қырғызстан құрамасы үш жүлдені иеленіп, озық бес команданың қатарына еркін қосылды. Айсұлу қатарынан екінші мәрте әлем чемпионы атанса, Айпері Медетқызы қолаға қол созды. Ал кеше түнде Мээрим Жұманазарова ақтық сында айқасты. Егер ол алтын тұғырға көтеріліп жатса, оған біз еш таңданбаймыз. Өйткені Жұманазарованың өрелі өнерін біз өз көзімізбен көрдік. Жанкештілігі мен табандылығына сүйсіндік. Жеңіске деген құштарлығына тәнті болдық. Сондықтан да қырғыз қызының бойында чемпион атануға қажетті қасиеттің барлығы да бар деп нық сеніммен айта аламыз. Бәрі біз ойлағандай болса, аталған мемлекеттің әйелдер құрамасы командалық сайыста озық үштіктің қатарына қосылатыны айдан анық. Тіпті жапон балуанынан жеңіліп қалған жағдайдың өзінде Мээримге ешкім де өкпе айта алмайды. Биыл Токио Олимпиадасында қола медальды мойнында жарқыратқан спортшы үшін әлемдік доданың күміс медалі де аз олжа емес.
