Төл спортымыздың көкпар, аламан бәйге, теңге ілу, аударыспақ, жамбы ату, қазақ күресі, тоғызқұмалақ, асық ату сынды түрлері бойынша 8 мыңға жуық адам бақ сынаған сайыс командалық тәртіппен өтті. Тамыз айында басталып, қара күзге дейін екі айға жуық уақытқа созылған, көрермен халықтың қанын қоздырған дүбірлі додаға еліміздің 14 облысының және екі қаласының командалары қатысты.
Сонымен қазақ күресінен және көкпар тартудан Жамбыл облысының балуандары басым түсті. Аударыспақ пен теңге ілуден, сондай-ақ жамбы атудан, асық ойынынан Түркістан облысының спортшыларына тең келер қарсылас табылмады. Батыс Қазақстан облысы болса тоғызқұмалақтан жеңімпаз атанды.
Балуан білекті, темір тақымды, епті жігіттердің жарысында ерекше көзге түскен жеңімпаздар мен жүлдегерлер сыйлықсыз қалған жоқ. Ұлттық спорт федерациялары мен Ұлттық спорт түрлері қауымдастығы жекелей спортшылар мен командаларды қаржылай және басқа да бағалы сыйлықтармен марапаттады. Темір тұлпарға ие болғандар да бар.
Ұлттық спорт түрлері қауымдастығының президенті Бекболат Тілеухан:
– Жамбы ату федерациясының президенті Нұрлан Әметов мырза жеңімпазға арнайы темір тұлпар мінгізді. Біз де қауымдастық атынан темір тұлпар атадық. Сол кезде біздің спортшыларымыздың көзі бұрынғыдан да қаттырақ жанып, жарысқа ерекше ыждағатпен, ықыласпен кірісті. Фестиваль үлкен табыспен өтті. Келесі жарыстарда жамбы атудан нағыз мергендер, теңге ілуден нағыз сайыпқырандар бой көрсететініне күмәнім жоқ, – деді .
Отызжылдық торқалы тойға орайластырылған ұлан-ғайыр спорт шарасын ұйымдастыруға Мәдениет және спорт министрлігі Спорт және дене шынықтыру істері комитетіне қарасты «Ұлттық және ат спорты түрлері орталығы» РМҚК мұрындық болғанын айта кетейік. Екі жылда бір мәрте өткізілетін доданың дүбірі биыл ерекше болғаны анық.