– Патурльдік полиция қызметкерлері сондай жүргізушінің бірін 25 қыркүйекте сағат 04:10 шамасында Атырау қаласындағы А.Владимирский көшесінде тоқтатты. Cadillac Escalade маркалы көлігін тексеру кезінде рөлде отырған 1983 жылғы жүргізушіден ішімдіктің иісі байқалған. Медициналық сараптаманың корытындысымен оның жеңіл дәрежеде мас екені анықталды. Оған қатысты Әкімшілік құқықбұзушылық туралы кодексінің 608-бабының 1-бөлігімен (Жүргізушінің көлік құралын алкогольдік, есірткілік және (немесе) уытқұмарлық масаң күйде басқаруы, сол сияқты көлік құралын алкогольдік, есірткілік және (немесе) уытқұмарлық масаң күйдегі адамның басқарғаны үшін) әкімшілік хаттама толтырылды, – деп хабарлады департаменттің баспасөз қызметі.
Осындай тағы бір дерекке жүгінсек, 8 қазанда сағат 02:30 шамасында жедел басқару орталығының бейнебақылау қызметкерлері Атырау қаласындағы А.Владимирский көшесінде күдік тудырған Toyota RAV4 маркалы автокөлігін байқаған. Патрульдік полиция қызметкерлері аталған көлікті тоқтатып, тексеру жүргізгенде рөлдегі 1981 жылғы жүргізушіден ішімдіктің иісі шыққан. Медициналық сараптаманың қорытындысымен 40 жастағы әйелдің жеңіл дәрежедегі мас екені анықталып отыр. Мас жүргізушіге қатысты Әкімшілік құқықбұзушылық туралы Кодексінің 608-бабының 1-бөлігімен әкімшілік хаттама толтырылды. Сот шешімімен рульге мас күйде отырған әйел 7 жылға көлік құралын басқару құқығынан айырылып, 15 күнге әкімшілік қамауға алынды.
Ал облыстық соттың баспасөз қызметі ұсынған мәліметке сүйенсек, биылғы тоғыз айда Қылмыстық кодексінің 346-бабымен (Көлік құралдарын басқару құқығынан айырылған және алкогольдік, есірткілік және (немесе) уытқұмарлық масаң күйдегі адамның көлік құралын басқаруы, сол сияқты көлік құралын басқаруды осындай адамға беру немесе көлік құралын осындай адамның басқаруына жол беру) 38 жүргізушінің ісі сотта қаралды.
– Оның ішінде 30 адам бас бостандығынан айырылып, 8 адам бас бостандығынан шектеу жазасына сотталды. Сондай-ақ Әкімшілік құқықбұзушылық туралы кодексінің 608-бабына сәйкес 675 адамға қатысты әкімшілік құқық бұзушылық туралы істер қаралған. Оның ішінде 672 адамға әкімшілік жаза қолданылып, 3 адамға қатысты әкімшілік іс жүргізу тоқтатылған. Ал 630 адам қамаққа алынды. Оның ішінде 518 адамға қосымша жаза ретінде арнайы құқығынан айыру шарасы қолданылды. Бұған қоса 39 жүргізуші арнайы құқығынан айырылып, 3 адамға айыппұл салынды, – деп мәлім етті облыстық соттың баспасөз қызметі.
