Аймақтар • 19 Қазан, 2021

Білігін шыңдаған істен жаңылмас

35 рет көрсетілді

Газ саласы бұқара өмірінде қаншалықты маңызға ие болса, онымен тікелей жұмыс істеудің қауіптілігі мен тәуекелі де жоғары. Осыны ескерген компания басшылығы өз мамандарының кәсіби білігін шыңдау мақсатында «Үздік маман» байқауын өткізіп келеді. Байқаудың биылғы сыны да ұжым қызметкерлерін бір арнада тоғыстырып, өзара тәжірибе алмасуға тағы да бір таптырмас мүмкіндік тудырды.

Биылғы байқау Түркістан облысына қарасты Сайрам ауданы Ақбұлақ ауылының маңында орналасқан оқу-курстық комбинатының жаңа полигоны алаңында өтті. Эпидемиялық талаптарды сақтай отырып, ашық аспан астында өткен біліктілер бәсекесінің соңғы сынында бұған дейінгі өзара іріктеулерден сүрінбей өткен қызметкерлер бақ сынады. Атап айтқанда, финалдық байқауда 15 конкурстық мамандық бойынша 92 үміткер сынға түсті.

Сайысқа қатысушылар тартысты бә­секе­де табандылық танытып, өз тә­жіри­белерін көрсетті. Байқауды бағалау­шылар алқасы мамандардың кәсіби машыққа бейімділігін, командалық жұ­мыс істеу тактикасын, теория мен тәжі­ри­бені қатар меңгеруін, жылдамдық пен төзім­ділігін – жарыстың негізгі талабы ре­тінде бағалады.

Байқау комиссиясына төрағалық еткен «Интергаз Орталық Азия» АҚ Бас директорының бірінші орынбасары Бахтияр Ізбасаров жұмысшыларды ынталандыруға арналған «Үздік маман» байқауы жыл сайын ауқымын кеңейтіп, жас мамандарға тәжірибелік тұрғыдан толысуға сеп болғанын атап өтті.

– Дәстүрлі байқау пандемияға байланысты былтыр өткен жоқ. Жобаны биыл қайта жандандырған жайымыз бар. Бұл ел аймақтарындағы мамандарды бір алаңға жинап білігін шыңдауға жетелейтін, өз кәсібін сүюге ынталандыратын ерекше бастама. Газшылар қауіпті нысандарға қызмет көрсететіндіктен әр қызметкердің біліктілігі біз үшін өте маңызды. Байқау арқылы мамандардың шеберлік деңгейі арта түседі. Ал олардың жұмыс сапасы тұтынушыларға газды үздіксіз тасымалдауды қамтамасыз етуге мүмкіндік береді. Конкурс бізге ең мықты мамандарымызды және соған қарай әлсіз тұстарымызды да саралап берді. Мәселен, Қарағанды оқу-комбинатының мамандарының техникалық қауіпсіздік бойынша көбірек үйренуі қажеттігін біл­дік. Енді онда кәсіподақ комитеті тара­пынан жаттығу құралдары алынып беріледі. Мұнда жұмысшылар жиі жаттығып, келесі байқауда үздік нәти­же көрсетеді деп сенеміз. Байқау бары­сында қатысушылардың ынтасы мен белсенділігін байқадым. Олар тә­жірибеде өздерінің жақсы дайын­дық­та­рын көрсетті, – дейді байқау төрағасы.

«Электр газбен дәнекерлеуші» «Тех­но­ло­гиялық компрессорлар машинисі», «Желілік құбыр жүргізушісі», «Газ тарату стансасының операторы» сынды жалпы саны 15 аталым бойынша өрбіген байқауда үздік деп танылғандар қомақты сыйлықтарға ие болып, әр аталымда үш жүлдегер анықталып отырды.

Жеңімпаздарды марапаттау рәсімінде «Электр газбен дәнекерлеуші» аталымында көш басынан көрінген тараздық Серік Ешқаловты әңгімеге тарттық. Бұл жарысқа алғаш рет қатысқанын айтқан Серік алған әсерімен бөлісті. «Халыққа тікелей қызмет ететін болғандықтан біздің қызметіміз әрдайым мінсіз болуға тиіс. Кез келген тосын жайға дайын болу, өз ісімізді бүге-шүгесіне дейін білу басты талап. Компания басшылығы осыны үнемі назарымызға салып отырады. Осы мекемеде жұмыс істеп жат­қаныма үш жылдан асты. Бүгінгі бай­қау­да жиған тәжірибемді сарапқа салып, еліміздің түкпір-түкпірінен келген әріп­тестеріммен таныстым. Мұндай жо­ба­лар бізді қанаттандырады», дейді үз­дік маман.

Сөз орайы келгенде, «Үздік маман» бай­қауы өткен оқу курстық ком­би­на­ты­ның жаңа базасы туралы ай­рықша атай кеткен жөн. Ат шаптырым аумақты алып жатқан нысан уақыт талабына сай жабдықталған. Полигон аумағында автоматты газ тарату стансасы, шкафтық газ реттеу торабы, газ құдығы бар өңір­лік газ шаруашылығының алаңы, тіпті, дә­не­керлеу бекеттері де бар. Бір сөзбен айт­қанда, мұнда нағыз кәсіби мамандарды даярлауға барлық қолайлы жағдай жасалған. Кең тынысты оқу бөлмелері, тәжірибеге қажетті макеттер, тренажерлар мен қимадағы жабдықтың табиғи үлгілері нысанның ажарын ашып тұр. Жыл сайын 48 лауазым және түрлі мамандық бойынша 10 мың қызметкер оқытылады деп жоспарланған.

Соңғы жаңалықтар

Қазақстанда алтын қоры өсті

Экономика • Бүгін, 09:35

Бір тәулікте 683 науқас тіркелді

Коронавирус • Бүгін, 09:19

Халықты ревакциналау тәсілі өзгерді

Коронавирус • Бүгін, 09:15

Балық па, әлде жылан ба?

Аймақтар • Бүгін, 09:07

Үздік шетелдік ойыншы атанды

Теннис • Бүгін, 09:04

Індет кезінде тыныштық та ем

Коронавирус • Бүгін, 09:02

Ташкенттегі жарыс табысты басталды

Ауыр атлетика • Бүгін, 09:01

Ұшақ билеттері қымбаттады

Қоғам • Бүгін, 08:51

Ұқсас жаңалықтар