БҒМ ақпараты бойынша, БҰҰ-ның Бала құқықтары туралы конвенциясының халықаралық міндеттемелері мен ережелерін ұстана отырып, Қазақстан балалардың тегін міндетті орта білім алу құқығын, тегін арнаулы орта және жоғары білім алу мүмкіндігін толық көлемде іске асырады.
«Айта кетсек, қақтығыс аймағында болған балалармен жұмыс кезінде олардың балалық шаққа тән емес ортада болғандығын ескеру қажет. Осыған байланысты БҒМ әр баланы жеке сүйемелдеуді қамтамасыз ету, оларды қайта психологиялық жарақаттанудан қорғау үшін шаралар қабылдады», деп хабарлады комитеттен.
Ведомствоның мәліметінше, қақтығыс аймақтарынан «Жусан» операциясы аясында 516 қазақстандық бала қайтарылды. Олардың төртеуі туыстарына, Қырғызстан азаматтарына қамқорлыққа берілді.
Сонымен қатар бастапқы кезеңде психологиялық-медициналық-педагогикалық комиссиялардың көмегімен балалардың білім деңгейін, іскерлігі мен дағдыларын анықтау үшін жеке білім беру оқыту бағдарламасы және олардың әрқайсысы үшін психологиялық-педагогикалық қолдау картасы әзірленді.
Сондай-ақ бейімделу кезеңінде министрлік мұғалімдерді, репетиторларды, тәрбиешілерді тарта отырып, жазғы мектеп ұйымдастырды.
Ведомствода өткізілген шаралар кешені балаларға еліміздің білім беру ұйымдарында оқуын ауыртпалықсыз жалғастыруға, ал олардың кейбіреулері тиісті сыныпта оқуын жалғастыру үшін бір жылда екі сынып бағдарламасын игеруге мүмкіндік бергенін атап өтті.
Жасы бойынша оқытылмаған балалар да бар. Бірақ бұл тұрғыда БҒМ Балалар тиісті сыныптың бағдарламасын ауыртпалықсыз игеруі үшін мұғалімдер мен тәрбиешілердің көмегін қарастырды. Бұл іс-шаралар жылына 10 балаға екі сынып бағдарламасын игеруге және құрдастарымен бірге оқуды жалғастыруға мүмкіндік берді.
«Жалпы, балалардың белгілі бір оқу жетістіктері бар екенін атап өткім келеді, атап айтқанда балалардың 51%-ы (116) оқу озаттары мен жақсы оқитындар. Балалардың 30% (67) түрлі олимпиадалардың (7), шығармашылық конкурстар мен жарыстардың (60) қатысушылары мен жүлдегерлері атанды», деп атап өтті АҚДМ дін істері комитетінде.
