САТЫП АЛУ ҚҰНЫ ТҰРАҚТЫ
Апта басында теңгенің нарықтағы бағасы өзгеріп кеткені белгілі. Осы ретте халық тарапынан «азық-түлік және күнделікті тұтынатын тауарлардың бағасында өзгерістер бола ма?» деген күдіктің пайда болғаны рас. Дегенмен, бүгінде базардағы бағаның тұрақты екенін көріп отырмыз. Аталған мәселеге орай облыс басшысы Қырымбек Көшербаев жедел жиын өткізіп, күнделікті тұтынудағы тауарлар бағасының күрт өспеуін қадағалауды сала мамандары мен аудан және қала әкімдеріне тапсырған болатын. Тапсырмаға сәйкес қала әкімдігі тарапынан 4 мобильді топ құрылып, азық-түлік өнімдері мен жанар-жағармай бағасын тұрақтандыру аясында арнайы рейд жүргізді. Сондай рейдке облыстық кәсіпкерлік және туризм басқармасының бас маманы Сұлтанбек Бисенбаев, қалалық кәсіпкерлік бөлімінің басшысы Қожахмет Ілиясов бастаған топ халық көп баратын «Мирас», «Сырдария» секілді сауда орталықтарында болды. Азық-түлік, көкөніс өнімдерін сататын бұл сауда ошақтары бұрынғы бағаны сақтап тұр. Шиелі ауданының орталық базарында картоп, сәбіз, пияз, қырыққабат бұрынғысынша 60-80 теңге аралығында сатылуда. Бірінші сортты 50 келілік ұн 2700-2800 теңге көлемінде. Сиыр еті 1100 теңге тұрады. Нанның да бағасында өзгеріс болмаған. Аудан әкімі жергілікті саудагерлермен жиын өткізіп, азық-түлік бағасын негізсіз көтермеу мәселесін талқылағанның арқасында бағада ешқандай өзгеріс болған жоқ. Қазалы ауданының әкімі Бақыт Жахановтың тапсырмасымен бағаны тұрақтандыру жөніндегі арнайы жұмыс тобы құрылды. Аудандық кәсіпкерлік, өнеркәсіп және туризм бөлімінің басшысы Әліби Әбиев «Бағаны тұрақтандыру тұрғысында кент көлеміндегі «Ырыс-Болашақ», «Мұсаев», «Орын-Ай», «Ернар» базарлары мен сауда орталықтарында тиісті шаралар ұйымдастырылды. Бүгінде аудандағы баға тұрақты», дейді. Жалпы, Қызылорда облысының нарығындағы бағаларда бірқалыптылық байқалады. Тіпті, жанар-жағармай құю бекеттерінде де бұрынғы баға сақталып тұр. Ержан БАЙТІЛЕС, «Егемен Қазақстан». Қызылорда облысы.ОРЫНСЫЗ ДҮРЛІГУГЕ НЕГІЗ ЖОҚ
Ақжайық өңірінде АҚШ долларына шаққанда теңге бағамының өзгеруіне байланысты қатты алаңдаушылық пен орынсыз дүрлігуге негіз жоқ екені белгілі болып отыр. Өйткені, өңірдегі екінші деңгейдегі банктер мен валюта ауыстыратын қосындарда қаржы көзі жеткілікті. Жанар-жағармай бекеттерінде оның қоры бар. Сауда нүктелерінде әзірге күнделікті тұтыну тауарлары бойынша тапшылық байқалмайды. Сондай-ақ, аймақта зейнетақы мен әлеуметтік жәрдемақыларды уақытында беру тәртібі белгіленген. Орын алған жағдайға байланысты облыста және қала мен аудандарда қадағалау комиссиялары құрылды. Бұлардың басты міндеттері бағаның ретсіз өспеуін бақылау, халыққа қызмет көрсететін орындардың жұмыс барысын қатаң қадағалап, күнделікті мониторинг жасау болмақ. Әрине, өңірде теңге бағамының өсуіне байланысты осы жағдайды өз ұпайларын түгендеуге пайдаланып қалуға ұмтылғандар да кездеспей қалған жоқ. Осындай көріністер облыс орталығындағы кейбір жанармай бекеттері мен «Сулпак» және «Алсер» секілді ірі компаниялар тарапынан орын алды. Өйткені, олар бағаны негізсіз өсіру ниетімен теңге бағамы өзгерген алғашқы күндері жұмыс істемей жабық тұрды. Батыс Қазақстан облысы бойынша монополияға қарсы инспекция басшысы Валихан Разов мұндай қалтасын қалыңдатқысы келгендерге әкімшілік шаралар қолданылатыны, тіпті қажет жағдайда олардың лицензиялары алынып тасталатыны жөнінде амалдар қолданылатынын жеткізді. Біз кеше күнделікті тұтынатын азық-түлік тауарларының бағаларын білу мақсатында облыс орталығындағы бірқатар базарларда болған едік. Соның бірі «Ел-ырысы» ауылшаруашылық көтерме-бөлшек сауда базары. Жай ғана тұтынушы кейпінде бола жүріп өзіміз байқаған көріністерге қарағанда мұнда картоптан басқа азық-түлік түрлерінің бағасы айтарлықтай көтерілмеген. Картоптың бұған дейінгі бағасы 80-90 теңге төңірегінде болса, оның әр келісі қазір 120 теңгеге көтерілген. Мұның себебі неде деген сауалға базар басшысы тарапынан өткен жылы өңірде картоптың өнімі жоғары болған жоқ, сондықтан бұл дақыл түрі аймақтың өзге өңірінен тасымалданып жеткізілуде. Осы кезде көтерме баға өскендіктен бөлшек саудада да оның өсу үрдісі байқалды деген жауап алдық. Иә, жоғарыда айтылғандай Орал өңірінде әзірге шектен шыққан баға өсімі байқалмайды. Ал осындай көріністер орын алған жағдайда жергілікті атқарушы органдар тарапынан қажетті іс-шаралар кешені белгіленбек. Тұрғындар содан үлкен үміт күтеді. Темір ҚҰСАЙЫН, «Егемен Қазақстан». Батыс Қазақстан облысы.ТАМЫЗҒА ДЕЙІН НАН БАҒАСЫ ӨЗГЕРМЕЙДІ
Облыс әкімі Қанат Бозымбаевтың төрағалық етуімен теңге бағамына түзетулер енгізілуіне байланысты кеңес болып өтті. Жағдай барысын бақылауға орай облыста құрылған жұмыс топтарына облыс әкімінің орынбасарлары Ғани Сәдібеков, Нұржан Әшімбетов, Дүйсенбай Тұрғановтар басшылық жасауда. Топтар Ұлттық банк филиалымен бірлесіп валюта нарығында алыпсатарлыққа жол бермеу үшін әлеуметтік маңызы бар азық-түлік тауарының бағасына мониторинг жүргізеді. Кәсіпорындармен жасалған меморандумдардың орындалуын қатаң бақылайды. Сонымен қатар, Бәсекелестікті қорғау агенттігімен бірге, азық-түлік тауарлары бағасына талдау жасалады. Және де күнделікті қажетті тауарлар бағасына мониторинг жүргізілуде. Сондай-ақ, Мұнай және газ министрлігімен бірлесіп, трейдерлерден қолда бар бензин мен жанар-жағармай материалдарының көлемін анықтауға және белгіленген бағаның өсуіне жол берілмеуі қадағаланады. Жұмыс топтарын облыстың қалалары мен аудандарында тікелей әкімдер басқарады. Облыстық ауыл шаруашылығы, кәсіпкерлік және сауда басқармалары қаланың нан пісіретін кәсіпорындарының басшыларымен 2014 жылғы 1 тамызға дейін, яғни осы жылдың астық науқанына дейін нан бағасын тұрақтандыру бойынша меморандумдарға қол қойды. Фарида БЫҚАЙ, «Егемен Қазақстан». Павлодар облысы.ЖАҒДАЙ ЕРЕКШЕ БАҚЫЛАУДА
Теңге бағамының өзгеріске ұшырауы солтүстікқазақстандықтардың кей бөлігінде алаңдаушылық тудырғанымен, Үкімет тарапынан нақтылы қолданылған іс-шаралардың арқасында ешқандай дүрлігу, абыржушылық байқала қойған жоқ. Мемлекет басшысы Н.Назарбаевтың Премьер-Министр мен Ұлттық банк төрағасын қабылдау кезінде ел тұрғындарын сабырға шақырған сөздерінен кейін көңілдегі күдіктер тез сейіліп, 1 АҚШ долларының 185 теңге болып белгіленуі терең түсіністік тапты. Аймақ басшысы Самат Ескендіров аудан, қала әкімдерімен, ірі тауар өндірушілермен, валюта айырбастау бекеттерінің өкілдерімен өткізген шұғыл кеңесте бағаны тұрақтандыруды айрықша бақылауда ұстауды атап көрсетіп, әсіресе, азық-түлік бағаларын, коммуналдық қызмет пен жанар-жағармайды негізсіз қымбаттатпау бағытында бірқатар тапсырмалар жүктеді. Тиісті ведомоство басшылары өз есептерінде әлеуметтік маңызды тауарлар мен тағамдардың 30-дан астам түрлеріне мониторинг жүргізілгенін, ахуалдың тұрақты екенін жеткізді. Бағаның ырықтандырылуына жол бермеу мақсатымен сауда үйлерімен, базарлармен меморандум жасалып, айырбас қосындарының жұмысы жіті назарға алынған. Самат Сапарбекұлы күнделікті азық-түлікпен қоса жанар-жағармай бағасын да бақылауда ұстауды, алыпсатарлықпен, дүрбелең тудырушылықпен айналысқандарды жауапкершілікке тартуды, бағаны тежеу бойынша жүйелі мониторинг жүргізуді, арыз-шағымдарды қабылдайтын сенім телефондарын орнатуды міндеттеді. Ұлттық валюта бағамына қатысты өзгерістердің жергілікті өнім өндіретін кәсіпкерлерге еш қатыстылығы жоқтығын ерекше ескертті. Қазір жер-жерлерде бақылау штабтары құрылып, сауда жүйелерінің қызметі ерекше бақылауда тұр. Облыс әкімі бірқатар сауда орындарын аралап, азық-түлік бағаларының қалыптылығына көз жеткізді. «Бақыт» жанар-жағармай стансасы кешенінде болғанда жауапты тұлғалар А-92 маркалы бензин қоры жеткілікті екенін, әр литрі 115 теңгеден сатылып жатқанын мәлімдеді. «Семейный», «Северный», «Рахмет», «Технодом», «Нан плюс» секілді ірі гипермаркет, супермаркеттерде бірінші кезекте тұтынатын азық-түлік тағамдары бағасының қолжетімділігі аңғарылды. Петропавл нан комбинатының басшылығы ұнның қоры 4 айға жететінін, нан бағасы бұрынғы қалыпта сақталатынына сендірді. Өмір ЕСҚАЛИ, «Егемен Қазақстан». Солтүстік Қазақстан облысы.
